ਧੀਆਂ

ਧੀਆਂ ਹਾਲੇ ਛੋਟੀਆਂ ਈ ਨੇ ਮੇਰੀਆਂ

ਵੱਡੀ ਪੰਜਾਂ ਦੀ ਤੇ ਛੋਟੀ ਦੋ ਸਾਲ ਦੀ

ਮਾਂ ਆਂਹਦੀ ਏ

ਪੁੱਤ ਪਾਠ ਕਰਿਆ ਕਰੋ

ਤੇ ਗੁਰਦੁਆਰੇ ਜਾਇਆ ਕਰੋ

ਸਮਝਾਉਂਦੀ ਏ ਕਿ ਪੁੱਤਰ ਮਿੱਠੜੇ ਮੇਵੇ

ਬਾਬੇ ਨਾਨਕ ਨੂੰ ਕਹੋ

ਇੱਕ ਵੀਰ ਵੀ ਦੇਵੇ

ਸਕਰੀਨ 'ਤੇ ਚੱਲਦਾ

ਅੱਧ-ਨੰਗੀਆਂ ਕੁੜੀਆਂ ਦਾ ਨਾਚ ਵੇਖਣ ਤੋਂ ਵਰਜਦੀ ਏ

ਗੱਲ ਕੁੜੀਓ ਹਰਜ ਦੀ ਏ

ਗੁੱਸੇ 'ਚ ਅੱਜ ਸਵੇਰ ਦੀ ਏ

ਤੇ ਕੁੜੀਆਂ ਨੂੰ ਬਾਣੀ ਸੁਣਨ ਲਈ ਪ੍ਰੇਰਦੀ ਏ

ਧੀਆਂ ਹਾਲੇ ਛੋਟੀਆਂ ਈ ਨੇ ਮਰਜਾਣੀਆਂ

ਕੰਧ 'ਤੇ ਲੱਗੀ ਪਾਪਾ ਦੀ ਤਸਵੀਰ

ਘਰ ਨੂੰ ਜਿਵੇਂ ਪਿਆਰਦੀ ਏ

ਤੇ ਸਾਰੇ ਵਰਤਾਰੇ ਨੂੰ ਬਹੁਤ ਗੰਭੀਰਤਾ ਨਾਲ਼ ਨਿਹਾਰਦੀ ਏ

ਪੋਤੀਆਂ ਬਹੁਤ ਪਿਆਰੀਆਂ ਨੇ

ਪਰ ਨਸੀਹਤਾਂ ਦੀਆਂ ਮਾਰੀਆਂ ਨੇ

ਹੋਰ ਵੀ ਬੜਾ ਕੁੱਝ ਕਹਿੰਦੀ ਏ

ਪਰ ਰੂਹਾਂ ਦੀ ਭਾਸ਼ਾ ਸਮਝ ਕਿਹੜਾ ਪੈਂਦੀ ਏ ..

ਨਿੱਕੀ ਤਾਂ ਪਾਪਾ ਤੁਹਾਡੇ ਸਹਿਜ ਦੀ ਮੂਰਤ ਐ

ਵੱਡੀ ਦਾ ਚਿਹਰਾ ਜਿਵੇਂ ਤੁਹਾਡੀ ਸੂਰਤ ਐ

ਉਂਝ ਪੋਤੀਆਂ ਤੁਹਾਡੀਆਂ ਬਹੁਤ ਪਿਆਰੀਆਂ ਨੇ

ਜਿਉਣ-ਜੋਗੀਆਂ

ਭੈਣਾਂ ਮੇਰੀਆਂ ਦੇ ਹੁਣ

ਆਪੋ-ਆਪਣੇ ਰੁਝੇਵੇਂ ਨੇ

ਵੀਰੇ ਦੀਆਂ ਧੀਆਂ ਨੂੰ ਮਿਲਣ ਦੇ ਤਰਸੇਵੇਂ ਨੇ

ਮੇਰੀਆਂ ਧੀਆਂ ਦੇ ਚਾਅ ਪੂਰੇ ਕਰਦੀਆਂ ਨੇ

ਨਿੱਕੀ-ਨਿੱਕੀ ਮੰਗ ਪੂਰੀ ਕਰਨ ਲਈ

ਜਾਨੋਂ ਮਰਦੀਆਂ ਨੇ

ਪਰ ਉਹਨਾਂ ਦੀਆਂ ਆਪਣੀਆਂ ਧੀਆਂ ਲਈ

ਉਹਨਾਂ ਕੋਲ ਸਿਰਫ਼ ਨਸੀਹਤਾਂ ਨੇ,ਵਸੀਅਤਾਂ ਨਹੀਂ

ਧੀਆਂ ਮੇਰੀਆਂ ਹਾਲੇ ਛੋਟੀਆਂ ਈ ਨੇ ਨਿਮਾਣੀਆਂ

ਪਤਨੀ ਦਾ ਵੀ ਹੱਕ ਐ ਲਾਡਲੀਆਂ ’ਤੇ

ਚਿੰਤਾ 'ਚ ਰਹਿੰਦੀ ਏ

ਤੇ ਟੀ.ਵੀ. 'ਤੇ ਚੰਗੇ ਚੰਗੇ ਚੈਨਲ ਵੇਖਣ ਨੂੰ ਕਹਿੰਦੀ ਏ

ਜੀਨਾਂ ਵੀ ਪਾ ਲਿਆ ਕਰੋ

ਸੋਹਣੀਆਂ ਲੱਗਦੀਆਂ ਨੇ

ਕਮਿਸ਼ਨਰ ਦੇ ਬੱਚਿਆਂ ਦੇ ਕਿੰਨੀਆਂ ਫੱਬਦੀਆਂ ਨੇ

ਚੰਗੇ ਨੰਬਰ ਲਿਆ ਕਰੋ

ਤੇ ਪੁੱਤਾਂ ਵਾਂਗੂੰ ਰਿਹਾ ਕਰੋ

ਧੀਆਂ ਹਾਲੇ ਬੱਚੀਆਂ ਈ ਨੇ ਰੁੜ੍ਹ ਜਾਣੀਆਂ

ਗੱਲ ਤਾਂ ਮੈਨੂੰ ਵੀ ਥੋੜ੍ਹੀ ਥੋੜ੍ਹੀ ਅੱਖਰਦੀ ਏ

ਪਰ ਮੇਰੀ ਤਾਂ ਦੁਨੀਆਂ ਹੀ ਵੱਖਰੀ ਏ

ਮੈਨੂੰ ਉਹਨਾਂ ਦੇ ਵਿਆਹਾਂ ਦਾ ਨਹੀਂ

ਚਾਵਾਂ ਦਾ ਫ਼ਿਕਰ ਏ

ਮੇਰੀਆਂ ਇਬਾਰਤਾਂ 'ਚ ਹੁਕਮਾਂ ਦਾ ਨਹੀਂ

ਬੇਨਤੀਆਂ ਦਾ ਜ਼ਿਕਰ ਏ

ਧੀਆਂ ਹਾਲੇ ਛੋਟੀਆਂ ਈ ਨੇ ਜਿਉਣ ਜੋਗੀਆਂ

ਧੀਆਂ ਦੀ ਖ਼ੈਰੀਅਤ ਲਈ ਦੁਆ ਕਰੀਂ ਜੋਗੀਆ

ਧੀਆਂ ਮੇਰੀਆਂ ਹਾਲੇ ਛੋਟੀਆਂ ਈ ਨੇ

ਜਿਉਣ-ਜੋਗੀਆਂ।