ਗੀਤ
ਚਾਨਣੀਆਂ ਰਾਤਾਂ, ਚੰਨਾ !
ਮਿੱਠੀਆਂ ਹਵਾਈਂ ਵੇ,
ਲੁੱਛਦੀ ਹਾਂ ਮੱਛੀ ਵਾਂਗ
ਨੈਣ ਠਾਰ ਜਾਈਂ ਵੇ !
ਚਾਨਣੀਆਂ ਰਾਤਾਂ...
ਚੜ੍ਹੀ ਸਾਂ ਚੁਬਾਰੇ,
ਦਿਲ ਹੌਲ ਪਿਆ ਮੇਰੇ ਵੇ !
ਕੌਲੇ ਨਾਲ ਲੱਗ ਕੇ,
ਮੈਂ ਲੱਖਾਂ ਹੰਝੂ ਕੇਰੇ ਵੇ !
ਲਾਜ ਰੱਖ ਲੱਗੀਆਂ ਦੀ
ਸੁਣੀਂ ਹਟਕੋਰੇ ਵੇ !
ਚਾਨਣੀਆਂ ਰਾਤਾਂ...
ਪੁੰਨਿਆਂ ਦੀ ਰਾਤ,
ਚੰਨ ਪੈਲ ਪਿਆ ਪਾਏ ਵੇ,
ਸੁੱਤੇ ਅਰਮਾਨਾਂ ਨੂੰ
ਹਲੂਣ ਕੇ ਜਗਾਏ ਵੇ ।
ਅੰਗਾਂ 'ਚ ਤ੍ਰਾਟਾਂ,
ਪੌਣ ਫੁੱਲਾਂ ਨੂੰ ਖਿਡਾਏ ਵੇ !
ਚਾਨਣੀਆਂ ਰਾਤਾਂ...
ਪਤਲੀ ਪਤੰਗ ਜਹੀ,
ਜਿੰਦ ਖਾਏ ਝੋਲੇ ਵੇ !
ਹੱਥ ਤੇਰੇ ਡੋਰ, ਤੂੰ
ਹਿਲਾ ਜਾ ਪੋਲੇ ਪੋਲੇ ਵੇ ।
ਅੱਲੜ੍ਹ ਜਵਾਨੀ ਮੇਰੀ,
ਕਿੱਥੇ ਦੁੱਖ ਫੋਲੇ ਵੇ ?
ਚਾਨਣੀਆਂ ਰਾਤਾਂ ...
