ਗੀਤ
ਕਿਹੜੀ ਗਲੋਂ ਕੀਤੀਆ ਵੇ
ਅਸਾਂ ਵਲ ਕੰਡ ਵੇ ?
ਕਿਹੜੀ ਗਲੋਂ ਮੋੜੀਆ ਵੇ,
ਅਸਾਂ ਵਲ ਕੰਡ ਵੇ ?
ਸੌਣ ਦਾ ਮਹੀਨਾ
ਜਾਗ ਪਿਆ ਮੁੜ ਨਿਹੂੜਾ ਵੇ,
ਬਦਲਾਂ ਨੂੰ ਗੰਢ,
ਜਿਵੇਂ ਗੋਰੀ ਦਾ ਜੂੜਾ ਵੇ,
ਤੂੰ ਵੀ ਖੋਹਲ ਗੰਢ,
ਖੁਲ੍ਹੀ ਬਦਲਾਂ ਦੀ ਗੰਢ ਵੇ।
ਸੌਣ ਦਾ ਮਹੀਨਾ
ਗੂੜੇ ਪ੍ਰੀਤਾਂ ਦੇ ਰੰਗ ਵੇ,
ਧਰਤੀ ਦੇ ਲੱਕ
ਵੀਣੀ ਗਗਨਾਂ ਦੀ ਤੰਗ ਵੇ,
ਦੁਨੀਆਂ ਨੇ ਸੰਙ ਛੱਡੀ,
ਤੂੰ ਵੀ ਛੱਡ ਸੰਙ ਵੇ।
ਸੌਣ ਦਾ ਮਹੀਨਾ,
ਖੁਲ੍ਹੇ ਧਰਤੀ ਦੇ ਅੰਗ ਵੇ,
ਗਗਨ ਹੋਏ ਮੱਤੇ
ਸੁੰਘ ਭੋਂ ਦੀ ਸੁਗੰਧ ਵੇ,
ਤੇਰੇ ਬਾਝ ਜਿੰਦ ਪਈ
ਬੂਹੇ ਵਾਂਗ ਬੰਦ ਵੇ।
ਸੌਣ ਦਾ ਮਹੀਨਾ,
ਖੁਲ੍ਹੀ ਬਦਲਾਂ ਦੀ ਮੀਂਢੀ ਵੇ,
ਕਾਹਨੂੰ ਮਾਰ ਬੈਠੋਂ ਜੀਵੇਂ
ਗੰਢ ਏਨੀਂ ਪੀਂਢੀ ਵੇ,
ਗੰਢਾਂ ਨਹੀਂ ਸਹਿਣ ਜੋਗੀ,
ਜਿੰਦੜੀ ਦੀ ਤੰਦ ਵੇ।
ਸੌਣ ਦਾ ਮਹੀਨਾ,
ਪਿਆ ਬਾਜਰੇ ਨੂੰ ਦਾਣਾ ਵੇ,
ਸਾਡੇ ਨਾਲ ਕਰੀਂ ਮਾਹੀਆ
ਹੋਰ ਨਾ ਧਿਙਾਣਾ ਵੇ,
ਕਲਿਆਂ ਨਾ ਕੱਟੇ ਹੋਰ,
ਜਿੰਦੜੀ ਦਾ ਪੰਧ ਵੇ।
ਸੌਣ ਦਾ ਮਹੀਨਾ,
ਪਿਆ ਛਲੀਆਂ ਨੂੰ ਦੁੱਧ ਵੇ,
ਅੰਬਰਾਂ ਤੋਂ ਡਿਗ,
ਚਾਹੇ ਧਰਤੀ 'ਚੋਂ ਉੱਗ ਵੇ,
ਪ੍ਰੀਤਾਂ ਦੇ ਹੰਢਾਏ ਥਾਝੋਂ,
ਜਿੰਦ ਗਈ ਹੰਢ ਵੇ ।
ਕਿਹੜੀ ਗਲੋਂ ਕੀਤੀਆ ਵੇ,
ਅਸਾਂ ਵਲ ਕੰਡ ਵੇ ?
ਕਿਹੜੀ ਗਲੋਂ ਮੋੜੀਆ ਵੇ,
ਅਸਾਂ ਵਲ ਕੰਡ ਵੇ ?
