ਇਸ਼ਕ ਸਲਾਮਤ
ਹੋਰ ਧੁਖ਼ਾ ਦੇ ਧੂਣੀ ਯਾਰਾ
ਲਾ ਕੇ ਮਨ ਵਿਚ ਇਸ਼ਕ ਦਾ ਲੰਬੂ
ਸਾੜ ਦੇ ਨਫ਼ਰਤ ਦੇ ਚੁਬਾਰੇ
ਸਾੜ ਦੇ ਅਣਖਾਂ ਵਾਲਾ ਤੰਬੂ
ਆਵੇ ਇਹੋ ਜਿਹੀ ਕਿਆਮਤ
ਰਹਿ ਜਾਏ ਬਾਕੀ ਇਸ਼ਕ ਸਲਾਮਤ
ਡਿਗ ਪੈਣ ਉੱਚੇ ਸ਼ਿਮਲੇ ਸਾਰੇ
ਢਹਿ ਪੈਣ ਮਹਿਲਾਂ ਦੇ ਮਿਨਾਰੇ
ਰਹਿ ਜਾਵਣ ਸੱਭ ਪ੍ਰੇਮ ਪੁਜਾਰੀ
ਮਰ ਜਾਵਣ ਸੱਭ ਨਫ਼ਰਤ ਮਾਰੇ
ਆਵੇ ਇਹੋ ਜਿਹੀ ਕਿਆਮਤ
ਰਹਿ ਜਾਏ ਬਾਕੀ ਇਸ਼ਕ ਸਲਾਮਤ
ਮੁੱਕ ਜਾਣ ਹੱਦਾਂ ਤੇ ਸਰਹੱਦਾਂ
ਟੁੱਟ ਜਾਣ ਕੰਧਾਂ ਉੱਤੇ ਬਨੇਰੇ
ਹਰ ਕੋਈ ਪੰਛੀ ਬਣ ਜਾਏ ਇੱਥੇ
ਜਿੱਥੇ ਚਾਹਵੇ ਕਰੇ ਬਸੇਰੇ
ਆਵੇ ਇਹੋ ਜਿਹੀ ਕਿਆਮਤ
ਰਹਿ ਜਾਏ ਬਾਕੀ ਇਸ਼ਕ ਸਲਾਮਤ
ਨਾ ਤੇ ਹੋਵੇ ਦੇਸ ਕਿਸੇ ਦਾ
ਨਾ ਪ੍ਰਦੇਸੀ ਹੋਵੇ ਕੋਈ
ਨਾ ਵਤਨਾਂ ਲਈ ਜੰਗਾਂ ਹੋਵਣ
ਨਾ ਸੱਜਣਾਂ ਲਈ ਰੋਵੇ ਕੋਈ
ਆਵੇ ਇਹੋ ਜਿਹੀ ਕਿਆਮਤ
ਰਹਿ ਜਾਏ ਬਾਕੀ ਇਸ਼ਕ ਸਲਾਮਤ
ਇਕ ਵਾਰੀ ਦਾ ਜੀਵਨ ਬੰਦਿਆ
ਉਹ ਵੀ ਮਿਲਦਾ ਚਾਰ ਦਿਹਾੜੇ
ਉਹਨੂੰ ਹੋਰ ਕੀ ਛੋਟਾ ਕਰਨਾ
ਪਾ ਕੇ ਨਿੱਤ ਨਿੱਤ ਰੋਜ਼ ਪੁਆੜੇ
ਆਵੇ ਇਹੋ ਜਿਹੀ ਕਿਆਮਤ
ਰਹਿ ਜਾਏ ਬਾਕੀ ਇਸ਼ਕ ਸਲਾਮਤ
ਰੀਝਾਂ ਨਾਲ ਹੰਡਾਈਏ ਇਸ ਨੂੰ
ਪਾ ਲਈਏ ਜਿਵੇਂ ਦਿਲ ਦੀਆਂ ਸੱਧਰਾਂ
ਸੋਹਣੇ ਸੁਫ਼ਣੇ ਵਾਂਗੂੰ ਤਕੀਏ
ਕਰੀਏ ਇਸ ਜੀਵਨ ਦੀਆਂ ਕਦਰਾਂ
ਆਵੇ ਇਹੋ ਜਿਹੀ ਕਿਆਮਤ
ਰਹਿ ਜਾਏ ਬਾਕੀ ਇਸ਼ਕ ਸਲਾਮਤ
ਝਗੜੇ ਜ਼ਾਤਾਂ, ਧਰਮਾਂ ਵਾਲੇ
ਛਵੀਆਂ, ਖ਼ੰਜਰ ਅਤੇ ਗੰਡਾਸੇ
ਦੱਬ ਦਈਏ ਇਕ ਕਬਰ ਬਣਾ ਕੇ
ਮੁੜ ਨ ਆਉਣ ਸਾਡੇ ਪਾਸੇ
ਆਵੇ ਇਹੋ ਜਿਹੀ ਕਿਆਮਤ
ਰਹਿ ਜਾਏ ਬਾਕੀ ਇਸ਼ਕ ਸਲਾਮਤ
