ਕਬੱਡੀ
ਕੌਡੀ ਕੌਡੀ ਕੌਡੀ
ਕੌਡ
ਕੌਡੀ ਕੌਡੀ ਕੌਡੀ
ਲੋਕਾਂ ਕੌਡੀ ਕੌਡੀ ਜੋੜੀ
ਤੂੰ ਤੇ ਬਣਿਆ ਕਰੋੜੀ
ਜਾਵੇਂ ਰਤ ਨੂੰ ਨਚੋੜੀ
ਕਉਡੀ ਪਾਉਣ ਵਾਲਿਆ
ਚਾਂਦੀ ਦੀਆਂ ਤਾਰਾਂ ਤੇ ਨਚਾਉਣ ਵਾਲਿਆ
ਹਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ ।
ਕਿਸੇ ਪਿੰਡੇ ਤੇ ਨਾ ਬੋਟੀ
ਕਿਸੇ ਤੇੜ ਨਾ ਲੰਗੋਟੀ
ਭੁੱਖੇ ਢਿਡ 'ਚ ਨ ਰੋਟੀ
ਕਉਡੀ ਪਾਉਣ ਵਾਲਿਆ
ਕਾਮਿਆਂ ਦੇ ਹੱਕ ਨੂੰ ਦਬਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਆਉਣ ਵਾਲਿਆ।
ਤੇਰੇ ਦੋਵੇਂ ਹਥ ਰੰਗੇ
ਲੀੜੇ ਪਹਿਣਦਾ ਏਂ ਚੰਗੇ
ਲੋਕੀਂ ਫਿਰਦੇ ਨੇ ਨੰਗੇ
ਕਉਡੀ ਪਾਉਣ ਵਾਲਿਆ
ਗੋਦੜੀ `ਚ ਲਾਲਾਂ ਨੂੰ ਲੁਕਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ
ਤੂੰ ਤੇ ਮੁਢੋਂ ਹੀ ਚਲਾਕ
ਤੇਰੇ ਦੀਦੇ ਨੇ ਬੇਬਾਕ
ਤੇਰੇ ਹੱਥ ਨੇ ਨਾਪਾਕ
ਕਉਡੀ ਪਾਉਣ ਵਾਲਿਆ
ਛੂਈਂ ਨਾ ਓਏ ਮੈਨੂੰ ਹੱਥ ਲਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ ।
ਲੋਕਾਂ ਲਾਉਣਾ ਇਕ ਧੱਫਾ
ਦੇਣਾ ਫਾਕਿਆਂ ਦਾ ਗੱਫਾ
ਉਤੋਂ ਮਾਰ ਲੈਣਾ ਜੱਫਾ
ਕਉਡੀ ਪਾਉਣ ਵਾਲਿਆ
ਰੋਟੀਆਂ ਬਰੂਦ ਦੀਆਂ ਲਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ।
ਭਾਵੇਂ ਮੱਲਾਂ ਭਾਵੇਂ ਪੰਡੇ
ਤੇਰੇ ਸਾਥੀ ਮੁਸ਼ਟੰਡੇ
ਤੇਰੇ ਹੋਛੇ ਹੱਥਕੰਡੇ
ਕਉਡੀ ਪਾਉਣ ਵਾਲਿਆ
ਨਿਤ ਨਵੇਂ ਫ਼ਿਤਨੇ ਜਗਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ ।
ਆਇਆ ਹਾੜ ਦਾ ਮਹੀਨਾ
ਹਾੜਾ ਤਪਦਾ ਏ ਸੀਨਾ
ਇਕ ਖੂਨ ਤੇ ਪਸੀਨਾ
ਕਉਡੀ ਪਾਉਣ ਵਾਲਿਆ
ਪਸ਼ੂਆਂ 'ਚ ਬੰਦੇ ਨੂੰ ਵਟਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ ।
ਤੇ ਭਰ ਲਈ ਤਜੌਰੀ
ਵੰਗ ਤੋੜੀ ਊ ਬਲੌਰੀ
ਗਊ ਖੋਹਲੀ ਊ ਨਗੌਰੀ
ਕਉਡੀ ਪਾਉਣ ਵਾਲਿਆ
ਪੈਰੋ ਪੈਰੋ ਝਗੜੇ ਵਧਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ ।
ਰੌਂਦ ਮਾਰ ਮਾਰ ਪੁਗੇਂ
ਰੋਜ਼ ਖੁੰਬਾਂ ਵਾਂਙ ਉਦੋਂ
ਨਿਤ ਹਰਾ ਹਰਾ ਚਗੇਂ
ਕਉਡੀ ਪਾਉਣ ਵਾਲਿਆ
ਹਰੇ ਭਰੇ ਖੇਤਾਂ ਨੂੰ ਜਲਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ ।
ਤੇਰੀ ਊਦੀ ਊਦੀ ਆਵਾਂ
ਕਉਡੀ ਲੰਮੀ ਲੰਮੀ ਪਾਵਾਂ
ਤੈਨੂੰ ਠਿੱਬੀ ਮਾਰ ਢਾਵਾਂ
ਕਉਡੀ ਪਾਉਣ ਵਾਲਿਆ
ਠੋਕਰਾਂ ਗਰੀਬਾਂ ਨੂੰ ਲਗਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ
ਉਤੋਂ ਲੈ ਕੇ ਆਵਾਂ ਗੇੜਾ
ਸਾਰਾ ਮੁੱਕ ਜਾਵੇ ਝੇੜਾ
ਕਰਾਂ ਖੇਡ ਦਾ ਨਬੇੜਾ
ਕਉਡੀ ਪਾਉਣ ਵਾਲਿਆ
ਲੋਕਤਾ ਦੇ ਨਾਲ ਟਕਰਾਉਣ ਵਾਲਿਆ
ਹੱਟ ਜਾ ਤੁੰ ਸਾਹਮਣੇ ਓਏ ਆਉਣ ਵਾਲਿਆ !
ਸੁੱਤੇ ਜਾਗ ਪਏ ਨੇ ਆੜੀ
ਉਠੀ ਦੁਨੀਆਂ ਲਤਾੜੀ
ਸੋਨਾ ਉਗਲੇ ਗੀ ਹਾੜੀ
ਕਉਡੀ ਪਾਉਣ ਵਾਲਿਆ
ਦਾਤਿਆਂ ਨੂੰ ਮੰਗਤੇ ਬਨਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ !
ਦੋਹਾਂ ਢੇਰੀਆਂ 'ਚ ਪਾਲਾ
ਮੈਂ ਤਾਂ ਛ ਲਿਆ ਸੁਖਾਲਾ
ਹੋਇਆ ਨਵਾਂ ਹੀ ਉਜਾਲਾ
ਕਉਡੀ ਪਾਉਣ ਵਾਲਿਆ
ਦਿਨ ਦੀਵੀਂ ਅੰਨ੍ਹੀਆਂ ਮਚਾਉਣ ਵਾਲਿਆ
ਹੱਟ ਜਾ ਤੂੰ ਸਾਹਮਣੇ ਓਏ ਆਉਣ ਵਾਲਿਆ !
ਲੋਕਾਂ ਜਿਤਣੀ ਕਬੱਡੀ
ਤੂੰ ਤੇ ਹਾਰ ਖਾਣੀ ਵੱਡੀ
ਫਾਡੀ ਰਹਿਣਾ ਤੂੰ ਵਡੀ
ਕਉਡੀ ਪਾਉਣ ਵਾਲਿਆ
ਵਿਹਲੜਾ ਓਏ ਗੋਗੜਾਂ ਵਧਾਉਣ ਵਾਲਿਆ !
ਕੌਡੀ ਕੌਡੀ ਕੌਡੀ
ਕੌਡ
ਕੌਡੀ ਕੌਡੀ ਕੌਡੀ
ਹੱਟ ਮਾਰਿਆ ਈ !
