ਕਿਤੋਂ ਕੋਈ ਅੱਜ ਏ

ਕਿਤੋਂ ਕੋਈ ਅੱਜ ਏ, ਹੁਸੀਨ ਆ ਗਿਆ ।

ਨੈਣਾਂ ਰਾਹੀਂ ਨੈਣ-ਰਸ, ਪੀਣ ਆ ਗਿਆ ।

ਕਿੰਨਾ ਸੋਹਣਾ, ਕਿੰਨਾ ਹੈ ਇਹ ਸ਼ੋਖ਼ ਰੰਗਲਾ !

ਕਰ ਗਿਆ ਜਵਾਨ ਅੰਗ ਨਾਲ ਅੰਗ ਲਾ !

ਰੱਬ ਜਿਹਾ ਜਿਵੇਂ ਕੋਈ ਕੁਲੀਨ ਆ ਗਿਆ।ਕਿਤੋਂ ਕੋਈ...

ਜੁੱਗਾਂ ਦੀਆਂ ਖਿੱਚਾਂ ਕੋਈ ਖਾ ਏ ਆ ਗਿਆ,

ਬੰਦੇ ਤੋਂ ਬਣਾਣ ਦੇਵਤਾ ਏ ਆ ਗਿਆ,

ਬਾਂਕਾ ਟੇਢਾ ਨਵਾਂ ਏ ਸ਼ੁਕੀਨ ਆ ਗਿਆ। ਕਿਤੋਂ ਕੋਈ...

ਬੁਕ ਬੁਕ ਪੰਡਾਂ ਬੱਧੀ ਨੂਰ ਡੁੱਲ੍ਹਿਆ,

ਧਰਤੀ ਉਤੇ ਹੋ ਕੇ ਭਰਪੂਰ ਡੁੱਲ੍ਹਿਆ,

ਪਾਟੇ ਹੋਏ ਲੰਗਾਰ ਸਭੇ ਸੀਣ ਆ ਗਿਆ । ਕਿਤੋਂ ਕੋਈ...

ਨੈਣਾਂ ਵਿਚ ਲੈਂਦੇ ਨੇ ਹੁਲਾਰੇ ਡੋਰੀਆਂ,

ਗੁੱਝੀਆਂ ਨਾ ਰਹੀਆਂ ਸੋਹਣੇ ਦੀਆਂ ਚੋਰੀਆਂ,

ਹਾਰਿਆ ਤੇ ਮੰਨ ਮੇਰੀ ਈਨ ਆ ਗਿਆ । ਕਿਤੋਂ ਕੋਈ...

ਬੱਲੇ ਬੱਲੇ ਨਿੱਗਾ ਦੀਆਂ ਕੀ ਉਡਾਰੀਆਂ

ਕਾਲ ਜਿਦ੍ਹੇ ਅੱਗੇ ਬਾਜ਼ੀਆਂ ਨੇ ਹਾਰੀਆਂ,

ਰੂਪ ਇਹ ਤਾਂ ਬੰਨ ਕੇ ਨਵੀਨ ਆ ਗਿਆ ! ਕਿਤੋਂ ਕੋਈ...

ਜਨਤਾ ਦੇ ਦਿਲਾਂ ਵਿਚੋਂ ਜਾਗ ਹੱਸਿਆ,

ਜੁਗਾਂ ਦੀਆਂ ਸੰਗਾਂ ਨੂੰ ਤਿਆਗ ਹੱਸਿਆ,

ਜੋਗੀ ਇਹ ਵਜਾਂਦਾ ਨਵੀਂ ਬੀਨ ਆ ਗਿਆ। ਕਿਤੋਂ ਕੋਈ...