ਸ਼ਿੰਗਾਰ

ਆਓ ਨੀ ਸ਼ਿੰਗਾਰੋ ਮੈਨੂੰ ਗੁੰਦ ਗੁੰਦ ਮੇਢੀਆਂ

ਅੱਜ ਇਕਰਾਰਾਂ ਵਾਲੀ ਰਾਤ,

ਜੂਠੇ ਜੂਠੇ ਬੁੱਲਾਂ ਨਾਲ ਦਸੋ ਨੀ ਸਹੇਲੀਓ

ਕਿੰਜ ਟੋਰਾਂ ਸੁੱਚੀ ਸੁੱਚੀ ਬਾਤ ।

ਮੱਥੇ ਉਤੇ ਲਾਓ ਨੀਂ ਨਸੀਬਾਂ ਦੀਆਂ ਦੌਣੀਆਂ

ਸੱਧਰਾਂ ਦਾ ਡੋਹਲੋ ਨੀ ਸੰਧੂਰ,

ਕੰਨਾਂ ਵਿਚ ਪਾਉ ਮੇਰੀ ਤੋਬਾ ਵਾਲੇ ਕੋਕਲੇ

ਨੱਕ ਵਿਚ ਟੁੱਟਿਆ ਗ਼ਰੂਰ ।

ਨੈਣਾਂ ਵਿਚ ਪਾਓ ਮੇਰੇ ਕਜਲਾ ਉਡੀਕ ਦਾ

ਤਿੱਖੀ ਤਿੱਖੀ ਖਿੱਚਣੀ ਜੇ ਧਾਰ,

ਬੁੱਲ੍ਹਾਂ ਉਤੇ ਰਖੋ ਨੀ ਗ਼ੁਲਾਬ ਦੀਆਂ ਪੱਤੀਆਂ

ਠੋਡੀ ਉਤੇ ਤਿਲ ਪਹਿਰੇਦਾਰ।

ਪੈਰਾਂ ਵਿਚ ਬੰਨ੍ਹੋ ਲੋਕ-ਲਾਜ ਦੀਆਂ ਝਾਂਜਰਾਂ

ਔਗਣਾਂ ਦੀ ਦੇਵੋ ਖੜਤਾਲ,

ਬਣ ਕੇ ਦਿਵਾਨੀ ਅੱਜ ਮੀਰਾ ਵਾਂਙੂੰ ਨੱਚਣਾਂ

ਨੱਚ ਨੱਚ ਹੋਣਾ ਏਂ ਬੇਹਾਲ ।

ਨਵ੍ਹਾਂ ਤੇ ਸਜਾਓ ਦਸਾਂ ਨਵ੍ਹਾਂ ਦੀ ਕਮਾਈ ਸਈਓ

ਹੱਥਾਂ `ਤੇ ਸਜਾਓ ਮੇਰੇ ਪਾਪ,

ਵੀਣੀ 'ਚ ਚੜ੍ਹਾਓ ਅਪਰਾਧਾਂ ਦੀਆਂ ਚੂੜੀਆਂ

ਚੀਚੀ 'ਚ ਗੁਨਾਹਾਂ ਵਾਲੀ ਛਾਪ।

ਸੁਣਿਐਂ ਨੀਂ ਦੇਂਦਾ ਖੁੱਲ੍ਹੇ ਦਿਲ ਨਾਲ ਮਾਫ਼ੀਆਂ

ਸੱਚਾ ਸੁੱਚਾ ਬੋਲੀਏ ਜਾਂ ਝੂਠ,

ਭੀਲਣੀ ਦੇ ਜੂਠੇ ਜੂਠੇ ਬੇਰ ਵੀ ਨਾ ਛੱਡਦਾ

ਸੱਚੀ ਸੁੱਚੀ ਹੋਵੇ ਜੇ ਨੀ ਜੂਠ ।

ਬੜਾ ਸ਼ੌਂਕ ਰਖਦਾ ਏ ਪੱਕੇ ਫਲ ਖਾਵਣ ਦਾ

ਝੁੰਬਦਾ ਨਾ ਕੱਚੇ ਕੱਚੇ ਬੁਰ,

ਗੁੱਛਿਆਂ ਦੇ ਗੁੱਛ ਮੇਰੀ ਜਿੰਦ ਨੂੰ ਨੇ ਲਗਦੇ

ਜ਼ਖ਼ਮਾਂ ਦੇ ਪੱਕੇ ਨੇ ਅੰਗੂਰ ।

ਘੈਂਟ ਘੋਟ ਲਾਓ ਮੈਨੂੰ ਦੁਖਾਂ ਦੀਆਂ ਮਹਿੰਦੀਆਂ

ਸੂਲਾਂ ਨਾਲ ਕਰਨੀ ਸ਼ਿੰਗਾਰ,

ਦੂਜੀ ਵਾਰ ਹੁੰਦੀ ਤੇ ਮੈਂ ਐਨਾ ਨਾ ਨੀਂ ਡੋਲਦੀ

ਜਾਣਾ ਅਜ ਪਹਿਲੀ ਪਹਿਲੀ ਵਾਰ ।