ਸੁਪਨਾ
ਨੀਂਦਰ ਦੇ ਘਰ ਸੁਪਨਾ ਵਸਦਾ
ਸੁਪਨੇ ਵਸਦੀ ਤੂੰ
ਨੀ ਮਹਿਰਮ ਮੇਰੀਏ
ਸੁਪਨੇ ਘਰ ਦੀਆਂ ਉੱਚੀਆਂ ਕੰਧਾਂ
ਨਾ ਬੂਹਾ ਨਾ ਬਾਰੀ
ਸਾਖਸ਼ਾਤ ਤੈਨੂੰ ਮਿਲ ਨਹੀਂ ਸਕਦਾ
ਯਤਨ ਕਰਾਂ ਸੌ ਵਾਰੀ
ਨੀ ਮਹਿਰਮ ਮੇਰੀਏ
ਅੱਖਾਂ ਸਾਂਹਵੇਂ ਰੱਖਣ ਖ਼ਾਤਰ ਸੁਪਨਾ ਤੇਰਾ
ਮੈਂ ਇਸਨੂੰ ਫੜ ਲੈਣਾ ਚਾਹਵਾਂ
ਪਰ ਸੁਪਨਾ ਫੜਨਾ ਤਾਂ ਇਉਂ ਹੈ
ਜੀਕੁਰ ਫੜਨਾ ਪੌਣਾਂ ਦਾ ਪਰਛਾਂਵਾਂ
ਨੀ ਮਹਿਰਮ ਮੇਰੀਏ
ਏਸ ਰਾਤ ਦੀ ਉਮਰ ਛੁਟੇਰੀ
ਇਸ ਛੇਤੀ ਤੁਰ ਜਾਣਾ
ਨੀਂਦਰ ਅਤੇ ਏਸ ਨੇ ਮੇਰਾ
ਸੁਪਨਾ ਸੰਗ ਲੈ ਜਾਣਾ
ਨੀ ਮਹਿਰਮ ਮੇਰੀਏ
ਮੈਂ ਤੇਰੇ ਕੁਰਬਾਨ ਬਹੁਤ ਜਾਵਾਂਗਾ
ਜੇਕਰ ਤੂੰ ਇਕ ਵਾਰੀ
ਮਿਲਣ ਲਈ ਮੈਨੂੰ ਆ ਜਾਵੇਂ
ਕਰਕੇ ਪੌਣਾਂ ਦੀ ਅਸਵਾਰੀ
ਨੀ ਮਹਿਰਮ ਮੇਰੀਏ
ਸੁਪਨਾ ਕਿਸੇ ਸ਼ਹਿਰ ਨਾ ਰਹਿੰਦਾ
ਨਾ ਇਸਦਾ ਸਿਰਨਾਵਾਂ
ਕਿੱਥੇ ਭਾਲਣ ਜਾਵਾਂ ਇਸ ਨੂੰ
ਕਿੱਥੇ ਚਿੱਠੀਆਂ ਪਾਵਾਂ
ਨੀ ਮਹਿਰਮ ਮੇਰੀਏ
ਕਿਸ ਕੋਲੇ ਫ਼ਰਿਆਦ ਕਰਾਂ ਮੈਂ
ਕੌਣ ਸੁਣੂ ਦੁੱਖ ਮੇਰਾ
ਹਰ ਕੋਈ ਸੋਚੇ ਦੂਜਿਆਂ ਨਾਲੋਂ
ਉਸਦਾ ਦੁੱਖ ਵਡੇਰਾ
ਨੀ ਮਹਿਰਮ ਮੇਰੀਏ
ਫਿਰ ਵੀ ਮੈਂ ਸੁਪਨੇ ਬਲਿਹਾਰੇ
ਸ਼ੁਕਰ ਕਰਾਂ ਮੈਂ ਇਸਦਾ ਲੱਖਾਂ ਵਾਰੀ
ਵਿੱਛੜਿਆਂ ਦੇ ਦਰਸ ਕਰਾਵੇ
ਇਹ ਤਾਂ ਕਿੰਨਾ ਪਰਉਪਕਾਰੀ
ਨੀ ਮਹਿਰਮ ਮੇਰੀਏ
