ਵਿਜੋਗ ਗੀਤ

ਕਣੀਆਂ ਦੀ ਰੁਤ ਆਈ ਆ

ਕਣੀਆਂ ਦੀ ਰੁੱਤ ਆਈ ਆ, ਵੇ ਮਾਹੀਆ

ਕਣੀਆਂ ਦੀ ਰੁਤ ਆਈ ਆ...

ਨੀਵੋਂ ਬਦਲਾਂ ਦੇ ਲੜ ਛਿੱਜੇ

ਥਲ, ਪਰਬਤ ਤੇ ਜੰਗਲ ਭਿੱਜੇ,

ਮੇਰੀ ਜਿੰਦ ਤਿਹਾਈ ਆ

ਕਣੀਆਂ ਦੀ ਰੁਤ ਆਈ ਆ...

ਭਿੱਜ ਗਈ ਧਰਤੀ ਦੀ ਚੋਲੀ

ਨਾਲ ਖ਼ੁਸ਼ੀ ਸਭ ਦੁਨੀਆਂ ਮੌਲੀ

ਮੇਰੀ ਪੀੜ ਸਵਾਈ ਆ

ਕਣੀਆਂ ਦੀ ਰੁੱਤ ਆਈ ਆ...

ਅੰਬਰਾਂ ਤੇ ਕਸਤੂਰੀਆਂ ਹੁਲੀਆਂ,

ਬੱਦਲਾਂ ਦੀਆਂ ਗੰਢਾਂ ਖੁਲ੍ਹੀਆਂ

ਤੂੰ ਕੇਹੀ ਗੰਢ ਪਾਈ ਆ

ਕਣੀਆਂ ਦੀ ਰੁੱਤ ਆਈ ਆ...

ਲਾਹ ਦਿੱਤੀ ਦੁਨੀਆਂ ਨੇ ਸੰਙ ਵੇ

ਖੁਲ੍ਹ ਗਏ ਧਰਤੀ ਦੇ ਅੰਗ ਵੇ

ਅਸਾਂ ਨਾ ਪ੍ਰੀਤ ਹੰਢਾਈ ਆ

ਕਣੀਆਂ ਦੀ ਰੁੱਤ ਆਈ ਆ...