ਉੱਤੋਂ ਉੱਤੋਂ
ਮੰਦਾ ਜੇ ਬੋਲਿਆ ਤੂੰ ਦਿਲਦਾਰ ਉੱਤੋਂ ਉੱਤੋਂ ।
ਰੋਸੇ ਦਾ ਮੈਂ ਵੀ ਕੀਤਾ ਇਜ਼ਹਾਰ ਉੱਤੋਂ ਉੱਤੋਂ ।
ਲਗਦਾ ਹੈ ਖ਼ੂਬਸੂਰਤ ਸੰਸਾਰ ਉੱਤੋਂ ਉੱਤੋਂ ।
ਦਿਲਕਸ਼ ਹੈ ਖ਼ੁਸ਼ਨੁਮਾ ਇਹ ਬਾਜ਼ਾਰ ਉੱਤੋਂ ਉੱਤੋਂ ।
ਨੈਣਾਂ 'ਚੋਂ ਪੀਣ ਵਾਲੇ ਪੀਂਦੇ ਨੇ ਅੱਖ ਬਚਾ ਕੇ
ਕਰਦੇ ਨੇ ਤੋਬਾ ਤੋਬਾ ਮੈਅਖ਼ਾਰ ਉੱਤੋਂ ਉੱਤੋਂ ।
ਤੂੰ ਆ ਗਿਆ ਏਂ ਸੱਜਣਾ ਤੇਰੀ ਉਡੀਕ ਸੀ ਬਸ
ਰਾਜ਼ੀ ਏ ਮਰਨ ਵੇਲੇ ਬੀਮਾਰ ਉੱਤੋਂ ਉੱਤੋਂ ।
ਲੜ ਕੇ ਅਖ਼ੀਰ ਹੋਣਾ ਇਕ ਮਿਕ ਅਸੀਂ ਜੇ ਮਗਰੋਂ
ਕਰਦੇ ਹੋ ਐਵੇਂ ਕਾੜ੍ਹੋਂ ਤਕਰਾਰ ਉੱਤੋਂ ਉੱਤੋਂ ।
ਤੇਰੇ ਨਸੀਬੀਂ “ਆਰਿਫ਼ ਕਦੇ ਦੁਸ਼ਮਨੀ ਨਾ ਹੋਈ
ਕੀਤਾ ਏ ਦੋਸਤਾਂ ਨੇ ਵੀ ਪਿਆਰ ਉੱਤੋਂ ਉੱਤੋਂ ।
