ਦਿਲ ਦਾ ਹਾਲ

ਚੁਪ ਰਹਾਂ ਤਾਂ ਫਟਦੀ ਛਾਤੀ ਹੈ, ਕੁਝ ਕਹਾਂ ਤਾਂ ਲਗਦੀ ਕਾਤੀ ਹੈ,

ਇਸ ਉਸ ਵਿਚ ਚਿਣਗ ਚਵਾਤੀ ਹੈ, ਕਹੁ ਕੇਹੜੀ ਗੱਲ ਬਣਾਵਾਂ ਮੈਂ ?

ਕੀ ਦਿਲ ਦਾ ਹਾਲ ਸੁਣਾਵਾਂ ਮੈਂ ? ।੧।

ਇੱਕ ਮਿਲਿਆ ਮਸਤ ਮਵਾਲੀ ਹੈ, ਉਸ ਐਸੀ ਕੈਫ਼ ਪਿਆਲੀ ਹੈ,

ਨਿੱਤ ਨੈਣਾਂ ਦੇ ਵਿਚ ਵਾਲੀ ਹੈ, ਇਹ ਕੀਕਰ ਲਾਲ ਛਪਾਵਾਂ ਮੈਂ ?

ਕੀ ਦਿਲ ਦਾ ਹਾਲ ਸੁਣਾਵਾਂ ਮੈਂ ? ।੨।

ਇੱਕ ਦਿਲਬਰ ਪਿਆਰਾ ਪਾਇਆ ਹੈ, ਉਸ ਮੈਨੂੰ ਮਾਰ ਖਪਾਇਆ ਹੈ,

ਜਦ ਦੂਜਾ ਦੂਰ ਹਟਾਇਆ ਹੈ, ਹੁਣ ਕੀਕਰ ਆਪ ਲੁਕਾਵਾਂ ਮੈਂ ?

ਕੀ ਦਿਲ ਦਾ ਹਾਲ ਸੁਣਾਵਾਂ ਮੈਂ ? ।੩।

ਜੇ ਸੱਚ ਕਹਾਂ ਤੇ ਸੂਲੀ ਹੈ, ਮਨਸੂਰ ਭੀ ਆਪ ਕਬੂਲੀ ਹੈ,

ਹੱਕ ਬਾਝੋਂ ਹੋਰ ਫ਼ਜ਼ੂਲੀ ਹੈ, ਇਸ ਦੁਖ ਤੋਂ ਕਿਥੇ ਜਾਵਾਂ ਮੈਂ ?

ਕੀ ਦਿਲ ਦਾ ਹਾਲ ਸੁਣਾਵਾਂ ਮੈਂ ? ।੪।

ਅਬ 'ਕਿਸ਼ਨ ਸਿੰਘ' ਨਹੀਂ ਔਰ ਕਹੋ, ਇੱਕ ਸਾਹਿਬ ਜਾਣ ਖ਼ਾਮੋਸ਼ ਰਹੋ,

ਮਿਲ ਹੋਸ਼ਮੰਦਾਂ ਸੇ ਹੋਸ਼ ਲਹੋ, ਕਿਉਂ ਨਾਹੱਕ ਸ਼ੋਰ ਮਚਾਵਾਂ ਮੈਂ ?

ਕੀ ਦਿਲ ਦਾ ਹਾਲ ਸੁਣਾਵਾਂ ਮੈਂ ? ।੫।