ਸਾਹਿਬਜ਼ਾਦਾ

ਸ਼ਾਪਿੰਗ ਪਲਾਜ਼ੇ ਦੀ ਪਾਰਕਿੰਗ 'ਚ

ਕਾਰ 'ਚੋਂ ਸ਼ੇਡਜ਼ ਵਿੱਚ ਦੀ ਦੇਖ ਰਿਹੈਂ ਸਾਰਾ ਤਲਿੱਸਮ

ਸਾਹਿਬਜ਼ਾਦਾ !

ਅਹੁ ਸਾਹਮਣੇ ਸੈਲੂਨ 'ਚ ਗਿਆ ਹੈ

ਕੋਈ ਨਵਾਂ ਹੇਅਰ ਕੱਟ ਬਣਵਾਉਣਾ ਹੈ

ਸਮੀਰ ਨੇ ਫੋਨ 'ਤੇ ਦੱਸਿਆ ਸੀ ਏਹਨੂੰ

ਕਿ ਇਹ ਕੱਟ

ਹੈ ਤਾਂ ਬਹੁਤ ਪੁਰਾਤਨ

ਪਰ ਅੱਜਕੱਲ੍ਹ ਫੇਰ ਬਹੁਤ ਪ੍ਰਚੱਲਿਤ ਹੈ

ਦੱਸਦਾ ਸੀ ਕਿ

‘ਪਰਫੈਕਟ ਕੱਟ’ ਤਾਂ ਨਾਗਪੁਰੋਂ ਪੈਂਦਾ

ਪਰ ਬਠਿੰਡਾ ਕਿਹੜਾ ਘੱਟ ਐ ਹੁਣ ਕਿਸੇ ਗੱਲੋਂ

ਆਗੂਆਂ ਨੇ ਹਰੇਕ ਸਹੂਲਤ ਲੈ ਆਂਦੀ ਐ ਇੱਥੇ ਵੀ

ਉਂਝ ਜੇ ਤੂੰ ਵੇਖੈਂ ਨਾ ਬਾਜਾਂ ਆਲ਼ਿਆ

ਮੜ੍ਹੰਗੇ ਤੋਂ ਜਵਾਂ ਅਜੀਤ ਸਿੰਓ ਦਾ ਭੁਲੇਖਾ ਪੈਂਦਾ

ਸਾਡੇ ਮੁਹੱਲੇ ਆਲ਼ੇ ਗੁਰਦੁਆਰਾ ਸਾਹਿਬ ਤੋਂ

ਸੰਗਤ ਗਈ ਸੀ

ਪਟਨਾ ਸਾਹਿਬ ਨੂੰ ਗੁਰੂਵਰ

ਮਾਤਾ ਜੀ ਮੇਰੇ ਇਹਦੀ ਦਾਦੀ

ਨਿੱਤਨੇਮੀ ਨੇ ਮੇਰੇ ਸੁਰਤ ਸੰਭਲਣ ਤੋਂ ਪਹਿਲਾਂ ਦੇ ਈ-

ਸ਼ਰਧਾ ਵੱਸ ਨਾਲ਼ ਈ ਗਏ ਸੀ ਜੱਥੇ ਦੇ

ਪਾਠੀ ਦੇ ਮੁੱਕਵਾਕ ਲੈਂਦਿਆਂ ਲੈਂਦਿਆਂ

ਮਾਤਾ ਜੀ ਦੇ ਮੁੱਖ ਨੇ ਮੰਗੀ ਸੀ

ਦਾਤ ਪੋਤੇ ਦੀ ਤੁਹਾਥੋਂ ਦਸਮੇਸ਼

ਦਾਤਾਂ ਬਖ਼ਸ਼ਣ ਵਾਲ਼ੇ ਓ

ਨਾਂਹ ਥੋੜ੍ਹਾ ਕਰਨੀ ਸੀ ਤੁਸਾਂ

ਉਦੋਂ ਇਹ ਆਵਦੀ ਮਾਂ ਦੇ ਗਰਭ 'ਚ ਈ ਸੀ ਮਾਅਰਾਜ

ਜਦੋਂ ਫ਼ੌਜ ਨੇ ਕੀਤੀ ਸੀ ਅਨਾਊਂਸਮੈਂਟ

ਹੱਥ ਖੜ੍ਹੇ ਕਰਕੇ

ਦਰਬਾਰ ਸਾਹਬ ਚੋਂ ਬਾਹਰ ਆਉਣ ਦੀ

ਤੇ ਇਹਦਾ ਮਾਰਾ ਕਲਗੀਆਂ ਵਾਲਿਆ

ਗ਼ੈਰਤ ਨੂੰ ਗਿੱਟਿਆਂ 'ਚ ਸੁੱਟ

ਕਰਕੇ ਹੱਥ ਖੜ੍ਹੇ

ਆ ਪਹੁੰਚਿਆ ਸੀ ਮੈਂ ਇਹਦੀ ਮਾਂ ਕੋਲ-

ਮਸਾਂ ਫ਼ਤਹਿ ਜਿੱਡਾ ਹੋਣਾ ਉਦੋਂ

ਬਹੁਤ ਬਿਮਾਰ ਹੋ ਗਿਆ ਸੀ

ਹਿੱਕ ’ਚੋਂ ਹੋ ਕੇ ਸਾਹ ਜਦੋਂ

ਗਲੇ ਤੱਕ ਆਉਂਦਾ ਤਾਂ ਲਗਦਾ

ਜਿਵੇਂ ਘੋਰੜੂ ਬੋਲਦਾ ਹੋਵੇ-

ਕਿੱਥੇ ਕਿੱਥੇ ਨੀ ਗਏ

ਇਹਨੂੰ ਲੈ ਕੇ ਬਾਜਾਂ ਵਾਲਿਆ

ਟੂਣੇ ਟੋਟਕੇ,ਤਾਗੇ ਤਵੀਤ

ਡੇਰੇ ਮਟੀਆਂ,ਪੁੱਛਾਂ ਪੌਣਾਂ

ਹਰਜੈਤ ਵੀ ਕਢਾਈ ਇਹਦੀ ਮਾਂ ਨੇ

ਪਰ ਮੋੜਾ ਨੀ ਪਿਆ-

ਚੰਡੀਗੜ੍ਹ ਦੇ ਪੀ.ਜੀ.ਆਈ. ਤੋਂ ਪਰਤਦਿਆਂ

ਰਾਹ 'ਚ ਈ ਤਾਂ ਪੈਂਦਾ ਫ਼ਤਹਿਗੜ੍ਹ ਸਾਹਿਬ

ਠੰਡੇ ਬੁਰਜ ਕੋਲ ਬੈਠਿਆਂ

ਪਤਾ ਨੀ ਤੁਹਾਡੇ ਤੋਂ

ਤੇ ਪਤਾ ਨੀ ਮਾਤਾ ਗੁਜਰੀ ਕੋਲ਼ੋਂ

ਨਮ ਅੱਖਾਂ ਨਾਲ਼ ਮੰਗੀ ਸੀ ਮਾਤਾ ਜੀ ਨੇ

ਇਹਦੀ ਦੇਹੀ ਦੀ ਤੰਦਰੁਸਤੀ

ਤੇ ਵੇਖ ਲੈ ਸਰਬੰਸ ਦਾਨੀਆ

ਅਠਾਰ੍ਹਵੇਂ 'ਚ ਐ ਹੁਣ

ਤੇ ਲਾਡਲੀਆਂ ਫ਼ੌਜਾਂ ਦੇ ਘੋੜੇ ਵਾਂਗੂੰ

ਹੜਦੰਗ ਹੜਦੰਗ ਕਰਦਾ ਫਿਰਦਾ

ਸੈਲੂਨ ਦਾ

ਗਾੜ੍ਹੇ ਨੀਲੇ ਰੰਗ ਦਾ ਦਰਵਾਜ਼ਾ ਖੁੱਲਿਐ

ਨੀਲੇ ਘੋੜੇ ਆਲ਼ਿਆ

ਆ ਰਿਹਾ ਮੇਰੇ ਵੱਲ ਸਾਹਿਬਜ਼ਾਦਾ!!

ਤੁਰਦੈ ਤਾਂ

ਧਮਕਦੀ ਐ ਧਰਤ

ਕਿਹਾ ਸੀ ਨਾ ਦਸਮੇਸ਼

ਮੜ੍ਹੰਗੇ ਤੋਂ ਜਵਾਂ ਅਜੀਤ ਸਿੰਓਂ ਲਗਦੈ-

ਪਰ ਚਾਲ !

ਅਜੀਤ ਦੀ ਨੀ ਲਗਦੀ

ਬਾਜਾਂ ਆਲ਼ਿਆ