ਡਾਚੀ
ਡਾਚੀ ਵਾਲਿਆ ਮੋੜ ਮੁਹਾਰ ਵੇ,
ਸੋਹਣੀ ਵਾਲਿਆ ਲੈ ਚੱਲ ਨਾਲ ਵੇ।
ਤੇਰੀ ਡਾਚੀ ਦੇ ਗਲ ਵਿਚ ਟੱਲੀਆਂ,
ਵੇ ਮੈਂ ਪੀਰ ਮਨਾਵਣ ਚੱਲੀਆਂ।
ਤੇਰੀ ਡਾਚੀ ਦੀ ਸੋਹਣੀ ਚਾਲ ਵੇ,
ਡਾਚੀ ਵਾਲਿਆ ਲੈ ਚੱਲ ਨਾਲ ਵੇ ।
ਤੇਰੀ ਡਾਚੀ ਥਲਾਂ ਨੂੰ ਚੀਰਨੀ,
ਵੇ ਮੈਂ ਪੀਰਾਂ ਨੂੰ ਸੁੱਖਨੀਆਂ ਸ਼ੀਰਨੀ।
ਆ ਕੇ ਤੱਕ ਜਾ ਸਾਡਾ ਹਾਲ ਵੇ,
ਡਾਚੀ ਵਾਲਿਆ ਲੈ ਚੱਲ ਨਾਲ ਵੇ।
ਤੇਰੀ ਡਾਚੀ ਦੇ ਚੁੰਮਨੀਆਂ ਪੈਰ ਵੇ,
ਤੇਰੀ ਸਿਰ ਦੀ ਮੰਗਨੀਆਂ ਖੈਰ ਵੇ।
ਸਾਡੀ ਜਿੰਦੜੀ ਨੂੰ ਇੰਜ ਨਾ ਗਾਲ ਵੇ,
ਡਾਚੀ ਵਾਲਿਆ ਲੈ ਚੱਲ ਨਾਲ ਵੇ।
ਤੇਰੀ ਡਾਚੀ ਤੋਂ ਸਦਕੇ ਮੈਂ ਜਾਨੀਆਂ,
ਪੰਜਾਂ ਪੀਰਾਂ ਨੂੰ ਪਈ ਵੇ ਮਨਾਨੀਆਂ।
ਸੁੱਖਾਂ ਸੁਖਨੀਆਂ ਤੇਰੀਆਂ ਲਾਲ ਵੇ,
ਡਾਚੀ ਵਾਲਿਆ ਲੈ ਚੱਲ ਨਾਲ ਵੇ।
