ਸਿੰਘ ਆਦਰਸ਼
ਸਤਿਗੁਰ ਢੰਡੋਰਾ ਪਿਟਵਾਇਆ ਉੱਚੀ ਬੋਲ ਸੁਣਾਇਆ,
ਬਾਬੇ ਦਾ ਦਰ ਖੁਲ੍ਹਾ ਸਭ ਲਈ, ਵਿਤਕਰਾ ਏਸ ਗਵਾਇਆ।
ਹਿੰਦੂ ਆਵੇ, ਸੀਨੇ ਲੱਗੇ, ਮੁਸਲਮਾਨ ਹੈ ਵੀਰਾ,
ਸਭਨਾਂ ਦੇ ਵਿਚ ਜਗ ਮਗ ਜਗਦਾ ਉਹੀ ਨਿਰਮਲ ਹੀਰਾ।
ਵੱਖ ਲਿਬਾਸ, ਜ਼ਬਾਨਾਂ, ਦੇਸ਼ਾਂ, ਹੈਨ ਸੁਭਾ ਬਦਲਾਏ।
ਚੂਹੜਾ ਹੈ ਲਾਲਚ ਵਿਚ ਆ ਜੋ ਸੱਟ ਵੀਰ ਨੂੰ ਮਾਰੇ,
ਉਹ ਚੰਡਾਲ ਨਾ ਬਖ਼ਸ਼ਯਾ ਜਾਣਾ, ਜੋ ਮਾਨੁੱਖਤਾ ਹਾਰੇ,
ਸਭ ਤੋਂ ਕਰਨੀ ਹੈ ਵੱਡੀ, ਨਾਮ ਅਮਲ ਦਾ ਸਿੱਖੀ,
ਏਥੇ ਤਿਲ ਵੀ ਘਾਲ ਕਿਸੇ ਦੀ, ਝੱਟ ਜਾਂਦੀ ਏ ਲਿੱਖੀ।
ਸਚੋ ਸੱਚ ਨਬੇੜਾ ਹੁੰਦਾ, ਨਹੀਂ ਸਫ਼ਾਰਸ਼ ਚਲਦੀ,
ਨਹੀਂ: ਵਕੀਲਾਂ ਦੀ ਉਸ ਅੱਗੇ ਦਾਲ ਰਤੀ ਵੀ ਗਲਦੀ।
ਝੂਠੇ, ਦਗ਼ੇਬਾਜ਼, ਦੁੱਧ ਪੀ ਕੇ ਜੋ ਵਿਸ ਘੋਲਣ ਵਾਲੇ,
ਉਹਨਾਂ ਨੂੰ ਰੱਜ ਪੈਣੀ ਜੁੱਤੀ, ਜੂਨੀ ਜੁਪਣ ਨਾਲੇ।
ਸਾਂਝੀਵਾਲ ਪਿਤਾ ਦੇ ਪੁੱਤਰ, ਸਾਂਝੀਵਾਲ ਸਦਾਈਏ,
ਕਦੇ ਨਾ ਬਚਨ ਹਾਰੀਏ ਅਪਣਾ, ਭਾਵੇਂ ਜ਼ਿੰਦਗੀ ਲਾਈਏ।
ਸੰਤ-ਸਿਪਾਹੀ ਸਿੰਘ ਸਜੀਲੇ, ਨਾਮ ਵੀ ਹਰ ਦਮ ਜਪਦੇ,
ਲੈ ਕੇ ਤੇਗ਼ ਪਾਪ ਦੇ ਰਾਕਸ਼ ਦੀ ਮੁੰਡੀ ਵੀ ਨੱਪਦੇ।
ਸਾਡੀ ਨੀਤੀ ਸੱਚ ਬੋਲਣਾ, ਸਚ ਆਚਾਰੀ ਰਹਿਣਾ,
ਸਿੱਧੀ ਸਾਫ਼ ਸਾਫ਼ ਗੱਲ ਕਰਨੀ, ਝੂਠ ਨਾ ਜੀਭੋਂ ਕਹਿਣਾ |
ਅਗਲੇ ਦੀ ਧੀ, ਧੀ ਜਾਣਨੀ, ਭੈਣ ਨੂੰ ਭੈਣ ਬਣਾਉਣਾ,
ਕਲਾਂ ਚੜ੍ਹਦੀਆਂ ਵਿਚ ਸਦ ਰਹਿਣਾ, ਝੋਰਾ ਨਹੀਂ ਮਨ ਲਾਉਣਾ।
ਨਿਜ ਨਾਰੀ ਵਿਚ ਪਯਾਰ ਵੰਡਣਾ, ਸਮਝ ਸਦਾ ਅਰਧੰਗੀ,
ਘਰ ਵਿਚ ਐਉਂ ਰਹਿਣ ਜਿਉਂ ਰਹਿੰਦੇ ਦੋ ਸੱਚੇ ਸਤਿਸੰਗੀ
ਮੈਂ ਸੁੰਦਰੀ ਨੂੰ ਜਿਵੇਂ ਪਿਆਰਾਂ ਵਿਚ ਭਰੋਸੇ ਰੱਖਾਂ,
ਫ਼ਰਕ ਨਾ ਪਇ ਵਰਤੋਂ ਵਿਚ ਕੋਈ, ਬਦਲਣ ਕਦੇ ਨ ਅੱਖਾਂ ।
ਇਕ ਦੇ ਵਿਚ ਵਿਸ਼ਵਾਸ ਰੱਖਣਾ, ਇਕ ਨੂੰ ਸੀਸ ਨਿਵਾਉਣਾ,
ਪੀਰ ਪੈਗ਼ੰਬਰ ਦੇਵੀ ਦੇਉਤਾ ਮੰਨਣਾ ਨਹੀਂ ਮਨਾਉਣਾ।
ਇੱਜ਼ਤ ਉਂਜ ਸਭਨਾਂ ਦੀ ਕਰਨੀ, ਸਭ ਦੀ ਸੇਵਾ ਕਰਨੀ,
ਹੋਣ ਨਾ ਦੇਣੀ ਕਰਨੀ ਨੀਵੀਂ, ਪੈ ਸਤਿਗੁਰ ਦੀ ਸ਼ਰਨੀ।
ਸਭ ਦਾ ਭਲਾ ਮਨਾਈਏ, ਸਭ ਨੂੰ ਵੀਰ ਆਖ ਗਲ ਲਾਈਏ,
ਟੋਏ ਟਿੱਬੇ, ਵੱਟਾਂ, ਬੰਨੇ ਢਾਹੀਏ ਤੇ ਪਧਰਾਈਏ।
ਇਬਰਾਹੀਮ ਸਿੰਘ ਹੈ ਸਜਿਆ ਹੈ ‘ਅਜਮੇਰ' ਸਦਾਇਆ,
ਕੇਡਾ ਸੋਹਣਾ ਫਬ ਫਬ ਪੈਂਦਾ ਹੈ ਜੋ ਬਾਣਾ ਹੈ ਪਾਇਆ।
ਸਿੰਘ ਅਜਮੇਰ ਵਰਜਿਆ ਇਕ ਦਿਨ ਸਭ ਸੰਗਤ ਨੂੰ ਖਾਣਾ,
ਤੇ ਕੀਤਾ ਘਰ ਉਸ ਦੇ ਸਤਿਗੁਰ ਸੰਗਤ ਸਣੇ ਪਿਆਣਾ।
ਲੰਗਰ ਸਜਿਆ ਬੜਾ ਸੁਆਦੀ, ਸੁਹਣੀਆਂ ਦੇਗ਼ਾਂ ਪਕੀਆਂ,
ਪੂੜੇ ਤਲੇ ਘਿਓ ਵਿਚ ਨਾਲੇ, ਖੀਰਾਂ ਵੀ ਰਜ ਛਕੀਆਂ।
ਦੇਗ਼ ਕੜਾਹ ਦੀ ਸਿੰਘ ਗੁਰੂ ਦੇ ਵਾਹਵਾ ਰੱਜ ਬਣਾਈ,
ਸਿੰਘਾਂ ਵੀ ਉਹ ਨਾਲ ਬਾਟਿਆਂ ਹਸ ਹਸ ਕੇ ਵਰਤਾਈ।
ਛੋਲਿਆਂ ਦਾ ਦਾਲਾ ਸੀ ਜਿਸ ਨੂੰ ਚੰਗਾ ਤੜਕਾ ਲਾਇਆ;
ਸੀ ਅਚਾਰ ਡੇਲਿਆਂ ਦਾ ਵੀ ਦਿੱਤਾ ਨਾਲ ਸਵਾਇਆ।
ਸਿੰਘ ਪਰਸ਼ਾਦ ਨਾਲ ਰੱਜ ਗੱਜੇ, ਅੰਬਰ ਕੰਬਦਾ ਜਾਪੇ,
ਹੁਣ ਅਜਮੇਰ ਸਿੰਘ ਦੇ ਹਟ ਗਇ ਤਾਪ ਤੇ ਨਾਲ ਇਕਲਾਪੇ।
ਫੇਰ ਬੇਨਤੀ ਕੀਤੀ ਉਸ ਨੇ, “ਨਾਲ ਆਪਣੇ ਜੋੜੋ,
‘ਚਾਹਾਂ ਦੂਰ ਨਾ ਹੋਵੇ ਮਾਹੀ, ਸਾਥ ਨ ਮੇਰਾ ਤੋੜੋ।
ਲੜ ਲਾਇਆ ਜੋ ਲਾਜ ਰਖਣੀ, ਸਹਿਜ ਵਸੀ ਰਹੇ ਸੁਰਤੀ,
‘ਰਹੁ ਦੇਂਦਾ ਮਨ ਮੇਰੇ ਨੂੰ ਸਦ ਸੱਤਾ ਅਤੇ ਸਫੁਰਤੀ!”
ਅਰਜ਼ ਓਸ ਦੀ ਮੰਨੀ ਦਾਤੇ, ਸਨਮੁਖ ਹਾਜ਼ਰ ਰੱਖਿਆ,
ਤੇ ਉਸ ਏਸ ਜੋਤ ਦੀ ਰਾਹੀਂ ਮਹਾ ਜੋਤੀ ਨੂੰ ਲੱਖਿਆ।
