ਦੇਰ

ਤੂੰ ਬਹੁਤ ਦੇਰ ਨਾਲ ਆਈ ਏਂ

ਚਿੱਤਰ ਆਪਾਂ ਵੀ ਬਣਾ ਸਕਦੇ ਸਾਂ ਮੌਲਕ

ਤੂੰ ਬਹੁਤ ਦੇਰ, ਬਹੁਤ ਦੇਰ ਲਗਾ ਦਿਤੀ

ਆਪਣਾ ਰੰਗ ਕੋਲ ਮੇਰੇ ਰੰਗ ਦੇ

ਲੈ ਆਵਣ ਲਈ

ਤੂੰ ਬਹੁਤ ਦੁਨੀਆ ਤੋਂ ਸੀ ਡਰਦੀ ਰਹੀ

ਇਕ ਵੇਲਾ ਸੀ ਜਦੋਂ

ਰੰਗ ਸਾਧਾਰਨ ਸੀ ਤੂੰ

ਰੰਗ ਸਾਧਾਰਨ ਸਾਂ ਮੈਂ

ਪੁੱਛ ਤੂੰ

ਭਾਵੇਂ ਪਿਕਾਸੋ ਨੂੰ ਜਾਂ ਭਾਵੇਂ ਵੈਨ ਗ੍ਹੋ ਨੂੰ

ਕਿ ਕਲਾ

ਕਿਸੇ ਵੀ ਤਾਂ ਇਕ ਇਕੱਲੇ ਰੰਗ ਵਿਚ ਨਾ

ਕਲਾ ਰੰਗਾਂ ਦਾ ਮਿਲਾਪ

ਤੂੰ ਖੜੋਤੀ ਹੀ ਰਹੀ ਇੱਕੋ ਹੀ ਥਾਂਵੇਂ

ਇਕ-ਦੋ ਤਾਂ ਕਦਮ ਤੂੰ ਵੱਲ ਮੇਰੇ ਪੁਟਦੀ

ਮੰਨਦਾ ਹਾਂ ਕਹਿਰ ਦਾ ਮੌਸਮ ਸੀ ਬਾਹਰ

ਬਹੁਤ ਬਾਰਸ਼ ਸੀ ਅਤੇ ਝੱਖੜ ਵੀ ਸੀ ਝੁੱਲਦਾ

ਤੈਨੂੰ ਖ਼ਤਰਾ ਸੀ ਤੇਰਾ ਰੰਗ ਖੁਰਨ ਦਾ

ਉੱਡ ਜਾਂਦੇ ਨੇ ਉਹਨਾਂ ਦੇ ਰੰਗ

ਉਡੀਕਦਿਆਂ

ਮਨਪਸੰਦ ਬਾਹਰ ਦੇ ਮੌਸਮ

ਤੂੰ ਬਹੁਤ ਦੇਰ ਨਾਲ ਆਈਂ ਏਂ

ਉੱਡ ਚੁੱਕੇ ਨੇ ਆਪਣੇ ਰੰਗ ਹੁਣ ਤਾਂ

ਉੱਡ ਚੁੱਕੇ ਰੰਗਾਂ ਦਾ ਬੇਅਰਥ ਹੈ ਬਿਲਕੁਲ ਮਿਲਾਪ

ਕਿਸਤਰ੍ਹਾਂ ਰੰਗ ਨਵਾਂ ਜਨਮੇ

ਕਿਸਤਰ੍ਹਾਂ ਚਿਹਰਾ ਬਣੇ ਉਹ ਚਿਤ੍ਰ ਦਾ

ਦੇਰ ਹੋ ਚੁੱਕੀ ਹੈ ਤੈਨੂੰ ਬਹੁਤ ਹੁਣ ਤਾਂ

ਦੇਰ ਹੋ ਚੁੱਕੀ ਆਪਾਂ ਦੁਹਾਂ ਨੂੰ