ਚੰਦ ਵੇ
ਛੁਪ-ਛੁਪ ਜਾਏ ਜਦੋਂ ਬਦਲਾਂ 'ਚ ਚੰਦ ਵੇ।
ਟੁੱਟ-ਟੁੱਟ ਜਾਏ ਮੇਰੇ ਤੱਕਲੇ ਦੀ ਤੰਦ ਵੇ।
ਪੋਟਿਆਂ 'ਚ ਪੂਣੀ ਮੈਂ ਤੇ ਫੜਣੀ ਆਂ ਛੋਪਲੇ
ਅਰਸ਼ਾਂ ਤੇ ਤੰਦ ਨਾਲ ਚੜ੍ਹਣੀ ਆਂ ਛੋਪਲੇ ।
ਪਰ ਵੇ ਚਕੋਰ ਵਾਂਗ ਮੁਕਦਾ ਨਾ ਪੰਦ ਵੇ ।
ਟੁੱਟ-ਟੁੱਟ ਜਾਏ ...
ਬੇੜ ਭੈੜਾ ਟੁੱਟਿਆ, ਮੈਂ ਜ਼ੁਲਫਾਂ ਵਲੇਟੀਆਂ ।
ਖੁਲ ਗਈਆਂ ਓਨੀਆਂ ਮੈਂ ਜਿਨੀਆਂ ਵਲੇਟੀਆਂ ।
ਆਪਣੇ ਮੈਂ ਹਥੀਂ ਆਪ ਪਾ ਲਿਆ ਏ ਛੰਦ ਵੇ ।
ਟੁੱਟ-ਟੁੱਟ ਜਾਏ ...
ਮਾਂ ਭਾਣੇ ਚਰਖਾ ਮੈਂ ਕੱਤਣੀ ਆਂ ਢੋਲ ਵੇ ।
ਬੁਤ ਬਣ ਬੈਠੀ ਰਵ੍ਹਾਂ ਚਰਖੇ ਦੇ ਕੋਲ ਵੇ ।
ਸ਼ੂਕਦੇ ਸਪੋਲੀਆਂ ਦੇ ਵਾਂਗ ਬਾਜ਼ੂ ਬੰਦ ਵੇ ।
ਟੁੱਟ-ਟੁੱਟ ਜਾਏ ...
ਰੂਸ ਪਿਆ 'ਸਾਬਰਾ' ਰੁਸੇਵਿਆਂ 'ਚ ਗੱਲ ਵੇ ।
ਪਰ ਜਾਣ ਬੁਝ ਕੇ ਨਾ ਕਰ ਵੱਲ-ਛਲ ਵੇ ।
ਇਹੋ ਜਿਹੀਆਂ ਗੱਲਾਂ ਸਾਨੂੰ ਉਕਾ ਨਾ ਪਸੰਦ ਵੇ।
ਟੁੱਟ-ਟੁੱਟ ਜਾਏ ...
