ਚੰਨ ਵੇ
ਪਿਆਰ ਤੇਰਾ, ਆਪਣਾ ਮੈਂ ਵੇਖਾਂ ਚੰਨ ਵੇ ।
ਕਚ ਦੀਆਂ ਚੂੜੀਆਂ ਨੂੰ ਭੰਨ ਭੰਨ ਵੇ ।
ਵੇਖ ਮੇਰਾ ਪਿਆਰ ਟੋਟੇ ਵਿਚ ਕਿੰਨਾ ਵੇ ।
ਤੇਰੀ ਵਾਰੀ ਤੋੜਿਆ ਤੇ ਰਤਾ ਜਿੰਨਾ ਵੇ ।
ਕੱਚ ਦੀਆਂ ਟੋਟਿਆਂ ਨੇ ਸਚ ਬੋਲਿਆ,
ਤੂੰ ਸਚ ਭਾਵੇਂ ਮੰਨ, ਨਾ ਮੰਨ ਵੇ ।
ਕੱਚ ਦੇ ਨਹੀਂ ਟੁਕੜੇ ਹੈ ਦਿਲ ਮੇਰਾ ਵੇ ।
ਇਹਨਾਂ ਵਿਚ ਵਸਿਆ ਪਿਆਰ ਤੇਰਾ ਵੇ ।
ਦਿਲ ਦੀ ਤੂੰ ਗੱਲ ਛੱਡ ਮੇਰੇ ਹਾਣੀਆਂ,
ਤੇਰੇ ਉਤੋਂ ਘੋਲ-ਘਤਾਂ ਤਨ ਮਨ ਵੇ ।
ਜਦੋਂ ਕਿਤੇ 'ਚਾਨ-ਚੱਕ ਬੂਹਾ ਖੜਕੇ,
ਸੀਨੇ ਵਿਚ ਦਿਲ ਮੇਰਾ ਪਿਆ ਧੜਕੇ।
ਧੜਕਣਾਂ ਵਿਚੋਂ ਤੇਰਾ ਨਾਮ ਬੋਲਦੈ,
ਬਿਲਾ-ਸ਼ਕ ਸੁਣ ਲਈ ਤੂੰ ਲਾਕੇ ਕੰਨ ਵੇ ।
ਕਿਹੜੀ ਵੇ ਕੁਲਛਨੀ ਨੇ ਤੈਨੂੰ ਮੋਹ ਲਿਐ,
ਟੂਣੇਹਾਰੀ ਮੇਰਿਆਂ ਹੱਥਾਂ ਚੋਂ ਖੋਹ ਲਿਐ ।
'ਸਾਬਰਾ' ਜੇ ਵਾਰੀ ਕੋਲ ਆਣਕੇ,
ਮੰਨ ਲਾਂ ਜੇ ਦੂਰ ਕਰੇਂ ਮੇਰਾ ਜੰਨ ਵੇ ।
