ਇੱਕ

ਮਾਏ ਨੀਂ ! ਅੱਜ ਮੈਨੂੰ ਟੋਰ ਘਰ ਆਪਣੇ ਨੀਂ,

ਲੱਦ ਗਿਆ ਹਾਨਣਾਂ ਦਾ ਪੂਰ

ਜਿਵੇਂ ਸਾਡਾ ਸਾਰਿਆਂ ਦਾ ਢਿੱਡ ਰੋਟੀ ਮੰਗਦਾ ਏ,

ਮਾਂਗ ਮੇਰੀ ਮੰਗਦੀ ਸੰਧੂਰ ॥

ਜਿਵੇਂ ਤੇਰੇ ਮੁੜ੍ਹਕੇ ਦੀ ਮਹਿਕ ਮੇਰੇ ਬਾਬਲਾ ਵੇ,

ਲੁੱਟਦੇ ਨੇ ਭੌਰ ਦਿਨ-ਰਾਤ।

ਇਉਂ ਤੇਰੀ ਇੱਜ਼ਤਾਂ ਦੇ ਸਿਓ ਮਤਾਂ ਟੁੱਕ ਜਾਣ

ਲੰਬੜਾਂ ਦੇ ਤੋਤੇ ਕਮਜ਼ਾਤ

ਲੱਖੀਂ ਨਾ ਹਜ਼ਾਰੀਂ ਹੱਥ ਆਉਂਦੀਆਂ ਨੇ ਬਾਬਲਾ ਵੇ,

ਪੱਗਾਂ ਦੇ ਵੇ ਮਾਮਲੇ ਨੇ ਦੂਰ

ਜਿਵੇਂ ਸਾਡਾ ਸਾਰਿਆਂ ਦਾ ਢਿੱਡ ਰੋਟੀ ਮੰਗਦਾ ਏ,

ਮਾਂਗ ਮੇਰੀ ਮੰਗਦੀ ਸੰਧੂਰ ॥

ਵੀਰਨਾ ਵੇ ! ਕੇਸੂ ਦਿਆ ਫੁੱਲਾ, ਕਾਹਨੂੰ ਰੋਵਨਾ ਏਂ !

ਹੱਸ ਕੇ ਸੁਗੰਧੀਆਂ ਨੂੰ ਟੋਰ :

ਅੰਮੀਂ ਦਿਆ ਜਾਇਆ, ਤੇਰੇ ਢਿੱਡ ਦੀਆਂ ਜਾਣਦੀ ਹਾਂ,

ਦਿਲ ਵਿਚ ਦਾਜ ਦਾ ਏ ਸ਼ੋਰ ।

ਗੋਡੇ ਗੋਡੇ ਮੈਲ ਤੇਰੇ ਗਿੱਟਿਆਂ ਤੇ ਦਾਜ ਮੇਰਾ

ਪੋਟਿਆਂ ਤੇ ਗਿੱਠ ਗਿੱਠ ਨੂਰ ॥

ਜਿਵੇਂ ਸਾਡਾ ਸਾਰਿਆਂ ਦਾ ਢਿੱਡ ਰੋਟੀ ਮੰਗਦਾ ਏ,

ਮਾਂਗ ਮੇਰੀ ਮੰਗਦੀ ਸੰਧੂਰ ॥

ਪੰਜ ਸੱਤ ਬੰਬ ਮੇਰੀ ਡੋਲੀ ਵਿਚ ਰੱਖ ਦੇ ਵੇ,

ਕੱਖ ਤੈਥੋਂ ਮੰਗਦੀ ਨਾ ਹੋਰ।

ਬਿਖੜਾ ਸੁਣੀਂਦਾ ਪੈਂਡਾ ਸਹੁਰਿਆਂ ਦੇ ਪਿੰਡ ਦਾ ਵੇ,

ਚੱਪੇ ਚੱਪੇ ਵਸਦੇ ਨੇ ਚੋਰ

ਨਾਲੇ ਵੇ ਮੈਂ ਰੂਪ ਦੀ ਛਿਆਨੀ ਹੱਥੀਂ ਤਾਰ ਜਾਂਗੀ

ਮੰਗਦਾ ਏ ਮਹਿਲ ਦਾ ਗ਼ਰੂਰ

ਜਿਵੇਂ ਸਾਡਾ ਸਾਰਿਆਂ ਦਾ ਢਿੱਡ ਰੋਟੀ ਮੰਗਦਾ ਏ,

ਮਾਂਗ ਮੇਰੀ ਮੰਗਦੀ ਸੰਧੂਰ !!