ਕਿ ਤੇਰੀ ਯਾਦ ਆਈ ਏ (ਗੀਤ)

ਗ਼ਮਾਂ ਦੇ ਸ਼ਾਹ ਹਨੇਰੇ 'ਤੇ

ਕੋਈ ਚਾਨਣ ਜਿਹਾ ਸਰਕੇ

ਪਵੇ ਝਾਉਲਾ ਜਿਹਾ ਮੈਨੂੰ

ਜਿਵੇਂ ਮੈਂ ਵੇਖਿਆ ਤੈਨੂੰ :

ਤੇਰੀ ਝੂਠਲ ਤਿਊਰੀ 'ਚੋਂ,

ਜਿਵੇਂ ਅੱਖ ਮੁਸਕਰਾਈ ਏ,

ਭੁਲੇਖਾ ਹੀ ਪਿਆ ਮੈਨੂੰ,

ਕਿ ਤੇਰੀ ਯਾਦ ਆਈ ਏ !?

ਜਦੋਂ ਬਿਨ ਕਾਰਨੋਂ ਕੋਈ

ਕਦੇ ਹਉਕਾ ਜਿਹਾ ਨਿਕਲੇ,

ਦਿਲੇ ਦੀ ਚੁੱਪ ਦੇ ਵਿਚੋਂ

ਕਿਤੋਂ ਧੜਕਣ ਜਹੀ ਬੋਲੇ :

‘ਤੇਰੀ ਠੰਡੀ ਹਵਾ ਆਵੇ,

ਪੀਆ ਤੇਰੀ ਬਲਾ ਡੋਲੇ !

ਇਹ ਮੇਰੇ ਕੰਨ ਵੱਜੇ ਨੇ

ਕਿ ਤੇਰੀ ਯਾਦ ਆਈ ਏ ?!

ਕਿਸੇ ਨੇ ਹੱਥ ਮੋਢੇ 'ਤੇ

ਜਿਵੇਂ ਲਾ ਕੇ ਕਿਹਾ ਹੋਵੇ :

ਵੇ ਅੜਿਆ ਵੇਖ ਲੱਖਾਂ 'ਚੋਂ

ਲਿਆ ਪਹਿਚਾਣ ਮੈਂ ਤੈਨੂੰ !

ਹੈ ਲੂੰ ਲੂੰ ਅੱਖੀਆ ਹੋਇਆ, ਇਹ ਕੇਹੀ ਜਾਗ ਆਈ ਏ !

ਇਹ ਮੇਰੀ ਅੱਖ ਹੀ ਥਿੜਕੀ, ਕਿ ਤੇਰੀ ਯਾਦ ਆਈ ਏ ! ?