ਮੈਂ ਜੋਗੀ...
ਮੈਂ ਜੋਗੀ ਮੈਂ ਜੋਗੀ ਕੁੜੀਏ
ਜੰਗਲ ਦੇ ਵਿਚ ਡੇਰਾ
ਤੇਰੇ ਪਾਸੇ ਸਦਾ ਚਾਨਣੀ
ਸਾਡੇ ਘੁੱਪ ਹਨੇਰਾ
ਮੈਂ ਜੋਗੀ...
ਮੈਂ ਜੋਗੀ ਮੈਂ ਜੋਗੀ ਕੁੜੀਏ
ਦਿਲ ਦੀ ਧੂਣੀ ਤਾਵਾਂ
ਪਰ ਤੂੰ ਮੈਨੂੰ ਕਦੇ ਨਾ ਪੁਛੇਂ
ਮੈਂ ਕਿਉਂ ਜ਼ੋਹਦ ਕਮਾਵਾਂ
ਮੈਂ ਜੋਗੀ...
ਮੈਂ ਜੋਗੀ ਮੈਂ ਜੋਗੀ ਕੁੜੀਏ
ਹੱਠ ਦੀ ਮੰਜ਼ਲ ਮਾਰਾਂ
ਬੇਦਰਦਾਂ ਦੇ ਬੂਹੇ ਉਤੇ
ਨਿਸ ਦਿਨ ਅਲਖ ਗੁਜ਼ਾਰਾਂ
ਮੈਂ ਜੋਗੀ...
ਮੈਂ ਜੋਗੀ ਮੈਂ ਜੋਗੀ ਕੁੜੀਏ
ਜੋਗੀ ਮਸਤ ਦੀਵਾਨਾ
ਮੌਤ ਦੇ ਲੱਖ ਬਹਾਨੇ ਕੁੜੀਏ
ਜੀਣ ਦਾ ਇਕ ਬਹਾਨਾ
ਮੈਂ ਜੋਗੀ...
ਮੈਂ ਜੋਗੀ ਮੈਂ ਜੋਗੀ ਕੁੜੀਏ
ਜੋਗੀ ਦਰਦ ਰੀਞਾਣਾ
ਨਾ ਕੋਈ ਨਾਮ ਨਿਸ਼ਾਨੀ ਮੇਰੀ
ਨਾ ਕੋਈ ਠੌਰ ਠਿਕਾਣਾ
ਮੈਂ ਜੋਗੀ...
