ਮਿਹਰਬਾਨ ਮਿਹਰਬਾਨ

ਸਦਕੇ ਮੈਂ ਤੇਰੀ ਦੀਦ ਦੇ

ਜੁਗਨੂੰ ਜਿਹੇ ਉਮੀਦ ਦੇ

ਸਾਨੂੰ ਵੀ ਕੁਝ ਖ਼ਰੀਦ ਦੇ

ਧਰ ਲੈ ਰਹਿਣ ਇਹ ਜਿੰਦ ਜਾਨ...ਮਿਹਰਬਾਨ...

ਜਿਸਦੀ ਨਜ਼ਰ ਮੁਰਾਦ ਹੈ

ਲੂੰ ਲੂੰ 'ਚ ਜੋ ਆਬਾਦ ਹੈ

ਕ਼ਿਸਮਤ ਦਾ ਇਹ ਤਜ਼ਾਦ ਹੈ

ਹੋਇਆ ਨਾ ਸਾਡਾ ਰਾਜ਼ਦਾਨ...ਮਿਹਰਬਾਨ...

ਸੀਨੇ ਦਾ ਇਹ ਖ਼ਿਲਾਅ ਜਿਹਾ

ਜੀਵਨ ਦਾ ਇਹ ਤਣਾਅ ਜਿਹਾ

ਧੜਕਣ 'ਤੇ ਇਹ ਦਬਾ ਜਿਹਾ

ਚਾਹੁੰਦਾ ਰਿਹਾ ਤੇਰਾ ਧਿਆਨ...ਮਿਹਰਬਾਨ...

ਸੁਰਖ਼ੀ ਤੇਰੇ ਬਾਜ਼ਾਰ ਦੀ

ਕੀਮਤ ਨਹੀਂ ਪਿਆਰ ਦੀ

ਜ਼ਾਮਨ ਨਹੀਂ ਮਿਆਰ ਦੀ

ਨਾ ਹੈ ਵਫ਼ਾ ਦੀ ਤਰਜਮਾਨ...ਮਿਹਰਬਾਨ...

ਤੇਰੀ ਖ਼ੁਸ਼ੀ ਤੇਰੀ ਰਜ਼ਾ ਨੂੰ

ਸ਼ੋਖ਼ੀ ਤੇਰੀ ਤੇਰੀ ਅਦਾ

ਮੰਦਰ ਮੇਰਾ, ਕਾਬਾ ਮੇਰਾ

ਮੇਰੇ ਲਈ ਵਾਹਦ ਇਮਾਨ...ਮਿਹਰਬਾਨ...

ਰੌਣਕ ਤੇਰੀ ਉਡੀਕ ਦੀ

ਜੰਨਤ ਜਿਹੀ ਉਲੀਕਦੀ

ਕ਼ਿਸਮਤ 'ਚ ਹੈ ਸ਼ਰੀਕ ਦੀ

ਸਾਡੇ ਲਈ ਹੈ ਇਮਤਿਹਾਨ...ਮਿਹਰਬਾਨ...