ਸੱਜਣਾ ਵੇ
ਸੱਜਣਾ ਵੇ, ਆ ਬਹਿ ਜਾ ਸਾਡੇ ਕੋਲ।
ਚੰਨਾ ਵੇ, ਇਕ ਛਿੱਟ ਚਾਨਣ ਦੀ ਡੋਲ੍ਹ ।
ਸੱਜਣਾ ਵੇ, ਸਾਡੇ ਸਾਹੀਂ ਸਿਖਰ ਦੁਪਹਿਰਾਂ
ਸੱਜਣਾ ਵੇ, ਸਾਡੇ ਲੂੰ ਲੂੰ ਰਿਸੀਆਂ ਜ਼ਹਿਰਾਂ
ਸੱਜਣਾ ਵੇ, ਸਾਡੀ ਧੁਰ ਤੋਂ ਖਾਲੀ ਝੋਲ ।
ਸੱਜਣਾ ਵੇ, ਸਾਨੂੰ ਲੱਗੇ ਦੁੱਖ ਘਨੇਰੇ
ਸੱਜਣਾ ਵੇ, ਸਾਡੀ ਜਿੰਦ ਹੰਢਾਏ ਨ੍ਹੇਰੇ
ਸੱਜਣਾ ਵੇ, ਇਕ ਬੋਲ ਨਾ ਹੋਵੇ ਬੋਲ ।
ਸੱਜਣਾ ਵੇ, ਇਕ ਬਾਤ ਇਸ਼ਕ ਨੇ ਪਾਈ
ਸੱਜਣਾ ਵੇ, ਸਾਨੂੰ ਸਮਝ ਰਤਾ ਨਾ ਆਈ
ਸੱਜਣਾ ਵੇ, ਇਸ ਅੱਗ ਨੂੰ ਹੁਣ ਨਾ ਫੋਲ ।
ਸੱਜਣਾ ਵੇ, ਅਸੀਂ ਅੱਖੀਆਂ ਭਰ ਭਰ ਰੋਏ
ਸੱਜਣਾ ਵੇ, ਆਪਣੇ ਨਾ ਆਪਣੇ ਹੋਏ
ਸੱਜਣਾ ਵੇ, ਸਭ ਖੇਡੇ ਰੋਲ-ਘਚੋਲ ।
ਸੱਜਣਾ ਵੇ. 'ਦੀਦਾਰ' ਦੀ ਦਰਦ-ਕਹਾਣੀ
ਸੱਜਣਾ ਵੇ, ਸਭ ਗ਼ਮ ਨੇ ਇਸ ਦੇ ਹਾਣੀ
ਸੱਜਣਾ ਵੇ, ਸਾਡੀ ਭਰ ਜਾ ਸੱਖਣੀ ਝੋਲ ।
ਸੱਜਣਾ ਵੇ, ਆ ਬਹਿ ਜਾ ਸਾਡੇ ਕੋਲ ।
ਚੰਨਾ ਵੇ, ਇਕ ਛਿੱਟ ਚਾਨਣ ਦੀ ਡੋਲ੍ਹ ।
