ਤਿੰਨ

ਨਿੱਕੀ ਨਿੱਕੀ ਤਾਰਿਆਂ ਦੀ ਰੋੜੀ ਅਸਾਂ ਕੁੱਟ ਕੇ ਵੇ,

ਰੱਬ ਜੇਡੀ ਸੜਕ ਬਣਾਈ !

ਚੰਨ ਦੀ ਸਹੁੰ ! ਅੱਜ ਅਸਾਂ ਚਾਨਣੀ ਦੇ ਰਾਹਾਂ ਵਿਚ,

ਮੁੜ੍ਹਕੇ ਦੀ ਮਹਿਕ ਵਿਛਾਈ !!

ਵੇਖ ਕਿੱਦਾਂ ਤੁਪਕੇ ਦੀ ਗੋਦੀ ਵਿਚ ਖੇਡਦੇ ਨੇ

ਨਦੀ, ਨਾਲੇ, ਸਾਗਰ ਹਜ਼ਾਰਾਂ !

ਵੇਖ ਕਿੱਦਾਂ ਇੱਕ ਇੱਕ ਡੋਡੀ ਵਿਚ ਨੱਚਦੀਆਂ,

ਲੱਖ ਲੱਖ ਸੰਦਲੀ ਬਹਾਰਾਂ।

ਏਦਾਂ ਹੀ ਮੁਹੱਬਤਾਂ ਦੇ ਗੰਜ ਅਸਾਂ ਜੋੜ ਲੈਣੇ,

ਪਾਈ ਜਦੋਂ ਇੱਕ ਇੱਕ ਪਾਈ।

ਨਿੱਕੀ ਨਿੱਕੀ ਤਾਰਿਆਂ ਦੀ...

ਮੰਗਦੀ ਏ ਅੰਮਾਂ ਅੱਜ ਅੱਖੀਆਂ ਦੇ ਤਾਰਿਆਂ ਤੋਂ,

ਮੁੱਠ ਮੁੱਠ ਚਾਨਣੀ ਤੇ ਖ਼ੈਰ

ਆਂਦਰਾਂ ਦੇ ਵਾਸਤੇ ਹੀ ਆਂਦਰਾਂ ਤੋਂ ਮੰਗਦੀ ਏ,

ਲੱਪ ਲੱਪ ਜ਼ਿੰਦਗੀ ਦੀ ਖ਼ੈਰ।

ਐਡੀ ਸੁਹਣੀ ਮੰਗਤੀ ਨੂੰ ਜਾਨ ਦਾਨ ਦੇ ਦਿਓ ਵੇ

ਖ਼ੈਰ ਸਾਥੋਂ ਮੰਗਦੀ ਖੁਦਾਈ !!

ਨਿੱਕੀ ਨਿੱਕੀ ਤਾਰਿਆਂ ਦੀ…

ਸਮੇਂ ਦੀ, ਮੈਂ, ਪੱਤਰੀ ਨੂੰ ਨੀਝ ਨਾਲ ਵਾਚਿਆ ਏ,

ਅੱਜ ਸਾਡਾ ਮੁੱਕਿਆ ਵਿਯੋਗ।

ਮੇਲ ਦੇ ਖ਼ਿਆਲ ਵਿਚ ਨ੍ਹਾ ਕੇ ਗੋਰਾ ਹੋ ਗਿਆ ਏ

ਸੱਜਣਾਂ ਦੇ ਮਨਾਂ ਦਾ ਸੰਜੋਗ।

ਮਹਿੰਦੀ ਰੰਗੇ ਵਸਲਾਂ ਦੇ ਗਲ ਵਿਚ ਪਾ ਦਿਓ ਵੇ,

ਬ੍ਰਿਹੋਂ ਦੀ ਕੰਬਦੀ ਕਲਾਈ।

ਨਿੱਕੀ ਨਿੱਕੀ ਤਾਰਿਆਂ ਦੀ…

ਆਓ ਪ੍ਰਮਾਣੂਓ ! ਇਹ ਮੇਲਾ ਹੈ ਮੁਹੱਬਤਾਂ ਦਾ

ਰਲ ਮਿਲ ਨੱਚੀਏ ਤੇ ਗਾਈਏ।

ਤਿਲ ਫੁੱਲ ਲੈ ਕੇ ਆਓ ਚਲੀਏ ਵਹੀਰਾਂ ਪਾ ਕੇ,

ਏਕਤਾ ਦੇ ਰੱਬ ਨੂੰ ਮਨਾਈਏ।

ਏਸੇ ਵਿਚ ਸਾਡੀ ਕਲਿਆਣ ਮੇਰੇ ਹਾਣੀਓ ਵੇ,

ਏਸੇ ਵਿਚ ਦੇਸ਼ ਦੀ ਭਲਾਈ

ਨਿੱਕੀ ਨਿੱਕੀ ਤਾਰਿਆਂ ਦੀ...