ਉਦਾਸ ਗੀਤ
ਰੂਪ ਰੂਪ ਮਨ ਹੋਇਆ ਫਿਰ ਵੀ ਹਰ ਇਕ ਤਾਂਘ ਪਿਆਸੀ।
ਹੁਣ ਤੇ ਸਿਰ ਛੂਹ ਚੱਲੀ ਏ ਗਲ ਗਲ ਚੜ੍ਹੀ ਉਦਾਸੀ।
ਜੋਬਨ ਰੁੱਤ ਬਸੰਤੀ ਬੀਤੀ ਦਰ ਦਰ ਧੱਕੇ ਖਾ ਕੇ।
ਕੀ ਕਹੀਏ ਕੀ ਲਾਭ ਤੇ ਹਾਨੀ ਮਿਲਦੇ ਹਾਣ ਹੰਢਾ ਕੇ।
ਖੂਹ ਦੀ ਮਣ 'ਤੇ ਬਹਿ ਕੇ ਸੋਚੇ ਪਾਪਣ ਪ੍ਰੀਤ ਹਿਰਾਸੀ।
ਰੂਪ ਰੂਪ ਮਨ ਹੋਇਆ ਫਿਰ ਵੀ ਹਰ ਇਕ ਤਾਂਘ ਪਿਆਸੀ।
ਮਹਿਰਮ ਦਿਲ ਦੇ ਹੋ ਪਰਦੇਸੀ ਤੁਰ ਗਹੇ ਦੂਰ ਦਰਾਡੇ।
ਹਿਜਰ ਅਲੰਬੇ ਬਲਦੀਆਂ ਹਾਈਂ ਰਹਿ ਗਏ ਕੋਲ ਅਸਾਡੇ।
ਮੌਤ ਬਿਨਾਂ ਨਾ ਹੋਣੀ ਜਿੰਦੇ! ਕਿਧਰੇ ਬੰਦ ਖਲਾਸੀ।
ਰੂਪ ਰੂਪ ਮਨ ਹੋਇਆ ਫਿਰ ਵੀ ਹਰ ਇਕ ਤਾਂਘ ਪਿਆਸੀ।
ਬ੍ਰਿਹੋਂ ਕਸਕ ਸਿਰੋਂ ਪੈਰਾਂ ਤੱਕ ਸੀਨੇ ਦਰਦ ਵਿਛੋੜਾ।
ਨਾ ਭਰਦਾ ਨਾ ਫਿਸਦਾ ਕਿਧਰੇ ਰੱਤ-ਵਿਹੂਣਾ ਫੋੜਾ।
ਪਰ ਜੀਣਾ ਪਰ ਮਰਨਾ ਸਾਡਾ ਜੀਵਨ ਜੂਨ ਚੁਰਾਸੀ।
ਰੂਪ ਰੂਪ ਮਨ ਹੋਇਆ ਫਿਰ ਵੀ ਹਰ ਇਕ ਤਾਂਘ ਪਿਆਸੀ।
ਹੰਝੂਓ ! ਸਬਰ, ਮਤੇ ਖੁਰ ਜਾਵਣ ਆਸ ਦੀਆਂ ਬੁਨਿਆਦਾਂ।
ਉਛਲੋ ਨਾ ਜਲ ਬਿੰਬੋ ਦਿਲ 'ਚੋਂ ਬਣ ਬਣ ਕੇ ਫਰਿਆਦਾਂ।
ਸਾਡੇ ਰੁੱਸੇ ਰੱਬ ਨੂੰ ਸਾਡਾ ਅੰਤ ਹੀ ਆਣ ਮਨਾਸੀ।
ਰੂਪ ਰੂਪ ਮਨ ਹੋਇਆ ਫਿਰ ਵੀ ਹਰ ਇਕ ਤਾਂਘ ਪਿਆਸੀ।
ਹੁਣ ਤੇ ਸਿਰ ਛੂਹ ਚਲੀ ਏ ਗਲ ਗਲ ਚੜ੍ਹੀ ਉਦਾਸੀ।
ਸ੍ਰੋਤ
ਕਿਤਾਬ ਦਾ ਨਾਂ:
ਖ਼ੋਲਦੇ ਸਾਗਰ
ਲਿਖਾਰੀ:
ਬਿਸ਼ਮਿਲ ਫ਼ਰੀਦਕੋਟੀ
ਛਾਪਣਹਾਰ:
ਕੈਲੀਬਰ ਪਬਲੀਕੇਸ਼ਨ ਪਟਿਆਲਾ
Year:
2023
ਛਪਾਈ:
FIRST
