ਵੇਖ ਲੈ
ਦਿਲ ਕਿਤੇ ਅਪਣਾ ਲਗਾ ਕੇ ਵੇਖ ਲੈ ।
ਤੂੰ ਵੀ ਕਿਸਮਤ ਆਜ਼ਮਾ ਕੇ ਵੇਖ ਲੈ ।
ਹੈ ਅਜਬ ਇਸ ਦਾ ਨਸ਼ਾ ਇਸ ਦਾ ਸਰੂਰ
ਵੇਖ ਲੈ ਤੂੰ ਪਿਆਰ ਪਾ ਕੇ ਵੇਖ ਲੈ ।
ਕਰ ਲਈ ਨਫ਼ਰਤ ਬੜਾ ਚਿਰ ਕਰ ਲਈ
ਆ ਜ਼ਰਾ ਹੁਣ ਪਿਆਰ ਪਾ ਕੇ ਵੇਖ ਲੈ ।
ਬੁਝ ਨਹੀਂ ਸਕਦੀ ਇਹ ਆਤਿਸ਼ ਇਸ਼ਕ਼ ਦੀ
ਉਮਰ ਭਰ ਹੰਝੂ ਵਹਾ ਕੇ ਵੇਖ ਲੈ ।
ਸ਼ਾਇਦ ਇਹ ਸੁਣ ਕੇ ਕਰੇ ਉਹ ਪਿਆਰ ਫਿਰ
ਦਾਸਤਾਂ ਗ਼ਮ ਦੀ ਸੁਣਾ ਕੇ ਵੇਖ ਲੈ ।
ਬੈਠ ਜਾ ਕੰਢੇ ਝਨਾਂ ਦੇ ਸਿਦਕ ਨਾਲ
ਤੂੰ ਕਿਸੇ ਨੂੰ ਆਜ਼ਮਾ ਕੇ ਵੇਖ ਲੈ ।
ਜਾਣ ਹੀ ਵਾਲਾ ਏ ਹੁਣ ਬਿਸਮਿਲ ਤੇਰਾ
ਆਖ਼ਿਰੀ ਖ਼ਾਹਿਸ਼ ਹੈ ਆ ਕੇ ਵੇਖ ਲੈ ।
ਮਰ ਗਿਆ ਹੋਵੇ ਨਾ ਤੇਰੇ ਹਿਜਰ ਵਿਚ
ਆਪਣੇ “ਆਰਿਫ਼” ਨੂੰ ਜਾ ਕੇ ਵੇਖ ਲੈ ।
