ਅਜਮੇਰ ਰੋਡੇ ਇੱਕ ਪ੍ਰਸਿੱਧ ਕੈਨੇਡੀਅਨ ਪੰਜਾਬੀ ਲੇਖਕ ਹਨ, ਜੋ ਪੰਜਾਬੀ ਅਤੇ ਅੰਗਰੇਜ਼ੀ ਵਿੱਚ ਰਚਨਾ ਕਰਦੇ ਹਨ। ਉਹਨਾਂ ਨੂੰ ਕੈਨੇਡਾ ਵਿੱਚ ਪੰਜਾਬੀ ਥੀਏਟਰ ਦਾ ਮੋਢੀ ਮੰਨਿਆ ਜਾਂਦਾ ਹੈ। ਅਜਮੇਰ ਰੋਡੇ ਦਾ ਜਨਮ 1940 ਵਿੱਚ ਭਾਰਤੀ ਪੰਜਾਬ ਦੇ ਜਲੰਧਰ ਜ਼ਿਲੇ ਵਿੱਚ ਸਥਿਤ ਪਿੰਡ ਰੋਡੇ ਵਿੱਚ ਹੋਇਆ। ਉਹ ਇੱਕ ਕਿਸਾਨ ਪਰਿਵਾਰ ਨਾਲ ਸਬੰਧਿਤ ਸਨ ਅਤੇ ਉਹਨਾਂ ਦਾ ਬਚਪਨ ਪੰਜਾਬੀ ਸਭਿਆਚਾਰ ਵਿੱਚ ਬੀਤਿਆ। ਉਹਨਾਂ ਨੇ ਗੁਰੂ ਨਾਨਕ ਇੰਜੀਨੀਅਰਿੰਗ ਕਾਲਜ, ਲੁਧਿਆਣਾ (ਪੰਜਾਬ ਯੂਨੀਵਰਸਿਟੀ ਨਾਲ ਸਬੰਧਤ) ਤੋਂ ਇੰਜੀਨੀਅਰਿੰਗ ਵਿੱਚ ਬੈਚਲਰ ਡਿਗਰੀ ਪ੍ਰਾਪਤ ਕੀਤੀ। ਇਸ ਤੋਂ ਬਾਅਦ, ਉਹਨਾਂ ਨੇ ਪੰਜਾਬ ਵਿੱਚ ਇੱਕ ਅਸਿਸਟੈਂਟ ਪ੍ਰੋਫ਼ੈਸਰ ਵਜੋਂ ਵੀ ਕੰਮ ਕੀਤਾ। 1966 ਵਿੱਚ ਉਹ ਕੈਨੇਡਾ ਚਲੇ ਗਏ ਅਤੇ ਯੂਨੀਵਰਸਿਟੀ ਆਫ ਵਾਟਰਲੂ, ਓਨਟੈਰੀਓ ਤੋਂ ਐੱਮ.ਏ.ਐੱਸ.ਸੀ. (ਮਾਸਟਰ ਆਫ਼ ਅਪਲਾਈਡ ਸਾਇੰਸ) ਦੀ ਡਿਗਰੀ ਹਾਸਿਲ ਕੀਤੀ। ਇਹ ਉਹਨਾਂ ਦੇ ਜੀਵਨ ਵਿੱਚ ਇੱਕ ਵੱਡਾ ਮੋੜ ਸੀ, ਜਿਸ ਨੇ ਉਹਨਾਂ ਨੂੰ ਇੰਜੀਨੀਅਰਿੰਗ ਤੋਂ ਸਾਹਿਤ ਵੱਲ ਲੈ ਜਾਣ ਵਿੱਚ ਮਦਦ ਕੀਤੀ। ਕੈਨੇਡਾ ਵਿੱਚ ਵਸਣ ਤੋਂ ਬਾਅਦ, ਉਹਨਾਂ ਨੇ ਬੀਸੀ ਹਾਈਡਰੋ ਵਿੱਚ ਕੰਪਿਊਟਰ ਇੰਜੀਨੀਅਰ ਵਜੋਂ ਅਤੇ ਬੀਸੀ ਗੈਸ ਵਿੱਚ ਪਲੈਨਿੰਗ ਇੰਜੀਨੀਅਰ ਅਤੇ ਗਲੋਬਲ ਵਾਰਮਿੰਗ ਮਾਹਿਰ ਵਜੋਂ ਕੰਮ ਕੀਤਾ।
ਅਜਮੇਰ ਰੋਡੇ ਨੇ ਕਵਿਤਾ, ਨਾਟਕ, ਕਹਾਣੀ, ਅਨੁਵਾਦ, ਵਾਰਤਕ ਅਤੇ ਵਿਗਿਆਨ ਗਲਪ ਵਿੱਚ ਰਚਨਾ ਕੀਤੀ ਹੈ। ਉਹਨਾਂ ਨੇ 20 ਤੋਂ ਵੱਧ ਕਿਤਾਬਾਂ ਪ੍ਰਕਾਸ਼ਿਤ ਕੀਤੀਆਂ ਹਨ। ਉਹਨਾਂ ਦੀਆਂ ਜ਼ਿਆਦਾਤਰ ਰਚਨਾਵਾਂ ਸਮਾਜਿਕ ਮਸਲਿਆਂ ਬਾਰੇ ਹਨ। ਉਹਨਾਂ ਨੇ ਸੁਰਤੀ, ਸ਼ੁਭ ਚਿੰਤਨ ਅਤੇ ਲੀਲਾ ਵਰਗੇ ਕਾਵਿ-ਸੰਗ੍ਰਹਿ ਪੰਜਾਬੀ ਵਿਚ ਲਿਖੇ ਹਨ ਅਤੇ ਇਸ ਤੋਂ ਇਲਾਵਾਂ ਉਹਨਾਂ ਨੇ ਅੰਗਰੇਜ਼ੀ ਵਿਚ ਵੀ ਕਵਿਤਾਵਾਂ ਦੀ ਰਚਨਾ ਕੀਤੀ ਹੈ। ਅਜਮੇਰ ਰੋਡੇ ਨੇ ਅਨੁਵਾਦ ਅਤੇ ਸੰਪਾਦਕੀ ਦਾ ਕਾਰਜ ਵੀ ਕੀਤਾ ਹੈ। ਇਸ ਤੋਂ ਇਲਾਵਾ ਉਹਨਾਂ ਨੇ ਹੁਣ ਤਕ 10 ਨਾਟਕਾਂ ਦੀ ਨਿਰਦੇਸ਼ਨਾ, ਸਹਿਨਿਰਦੇਸ਼ਨਾ ਅਤੇ ਪ੍ਰੋਡਕਸ਼ਨ ਦਾ ਕੰਮ ਕੀਤਾ ਹੈ।
ਅਜਮੇਰ ਰੋਡੇ ਨੂੰ ਬੈਸਟ ਓਵਰਸੀਜ਼ ਪੰਜਾਬੀ ਲੇਖਕ ਅਵਾਰਡ, ਪੰਜਾਬ ਭਾਸ਼ਾ ਵਿਭਾਗ, ਪੰਜਾਬ, ਪ੍ਰਮੁੱਖ ਨਾਗਰਿਕ (ਸਾਹਿਤ) ਅਵਾਰਡ, ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ, ਪੰਜਾਬ, ਪੋਇਟ ਆਫ਼ ਲਾਈਫ਼ ਅਵਾਰਡ, ਜੀ.ਐੱਨ. ਇੰਜੀਨੀਅਰਿੰਗ ਕਾਲਜ, ਲੁਧਿਆਣਾ, ਸਰਟੀਫ਼ਿਕੇਟ ਆਫ਼ ਐਕਸੀਲੈਂਸ (ਥੀਏਟਰ), ਈਸਟ ਇੰਡੀਅਨ ਵਰਕਰਜ਼ ਐਸੋਸੀਏਸ਼ਨ, ਟੋਰਾਂਟੋ, ਕੈਨੇਡਾ, ਆਊਟਸਟੈਂਡਿੰਗ ਸਾਹਿਤਕ ਪ੍ਰਾਪਤੀ ਅਵਾਰਡ, ਰੋਡੇ ਹੈਰੀਟੇਜ ਕਮੇਟੀ, ਕੈਨੇਡਾ, ਅਨਾਦ ਫ਼ਾਊਂਡੇਸ਼ਨ ਅਵਾਰਡ, ਦਿੱਲੀ, ਭਾਰਤ , ਸਾਹਿਤਕ ਪ੍ਰਾਪਤੀ ਲਈ ਮਹਿਫਿਲ ਮੈਗਜ਼ੀਨ ਅਵਾਰਡ, ਵੈਨਕੂਵਰ, ਕੈਨੇਡਾ , ਆਰਟਿਸਟਿਕ ਵਿਜ਼ਨਰੀ ਅਵਾਰਡ, ਦਰਪਣ ਮੈਗਜ਼ੀਨ, ਵੈਨਕੂਵਰ, ਕੈਨੇਡਾ, ਲਾਈਫ਼ਟਾਈਮ ਅਚੀਵਮੈਂਟ ਅਵਾਰਡ, ਯੂਨੀਵਰਸਿਟੀ ਆਫ਼ ਬ੍ਰਿਟਿਸ਼ ਕੋਲੰਬੀਆ, ਕੈਨੇਡਾ ਆਦਿ ਹੋਰ ਬਹੁਤ ਸਾਰੇ ਮਾਣ ਸਮਨਮਾਨ ਪ੍ਰਾਪਤ ਕੀਤੇ ਹਨ।
-