ਈਸ਼ਵਰ ਸਿੰਘ ਚਿੱਤਰਕਾਰ

ਪੰਜਾਬੀ ਦੇ ਇਸ ਉੱਘੇ ਚਿੱਤਰਕਾਰ, ਕਵੀ ਅਤੇ ਲੇਖਕ ਦਾ ਜਨਮ 1911 ਈ. ਵਿਚ ਹੋਇਆ। ਮੇਊ ਸਕੂਲ, ਲਾਹੌਰ (ਪਾਕਿਸਤਾਨ) ਤੋਂ ਫਾਈਨ ਆਰਟਸ ਦੀ ਸਿੱਖਿਆ ਪ੍ਰਾਪਤ ਕਰਨ ਤੋਂ ਬਾਅਦ ਇਹ ਕੁਝ ਸਮਾਂ ਸਕੂਲ ਵਿਚ ਡਰਾਇੰਗ ਮਾਸਟਰ ਵੀ ਰਹੇ। ਇਹ ਕੇਂਦਰੀ ਸਰਕਾਰ ਦੇ ਸੂਚਨਾ ਵਿਭਾਗ ਵਿਚ ਸੀਨੀਅਰ ਆਰਟਿਸਟ ਦੇ ਅਹੁਦੇ ਤੇ ਲੱਗੇ ਰਹੇ। ਦਿੱਲੀ ਵਿਖੇ ਰਹਿੰਦੇ ਹੋਏ ਇਹਨਾਂ ਨੇ ਆਪਣੇ ਚਿੱਤਰਾਂ ਦਾ ਦੋ ਵਾਰ ਪ੍ਰਦਰਸ਼ਨ ਕੀਤਾ। ਸੰਨ 1961 ਵਿਚ ਇਹ ਆਪਣੇ ਪਰਿਵਾਰ ਸਮੇਤ ਇੰਗਲੈਂਡ ਚਲੇ ਗਏ। ਲੰਡਨ ਵਿਖੇ ਵੀ ਇਹਨਾਂ ਦੇ ਚਿੱਤਰਾਂ ਨੂੰ ਦੋ ਵਾਰ ਪ੍ਰਦਰਸ਼ਿਤ ਕੀਤਾ ਗਿਆ। ਸੰਨ 1966 ਵਿਚ ਇਹਨਾਂ ਨੇ ਇੰਗਲੈਂਡ ਵਿਚ ਪੰਜਾਬੀ ਸਾਹਿਤ ਸਭਾ ਲੰਡਨ ਦੀ ਸਥਾਪਨਾ ਕੀਤੀ ਅਤੇ ਬਾਅਦ ਵਿਚ ਇਸ ਸਭਾ ਦੇ ਸਰਪ੍ਰਸਤ ਬਣ ਗਏ। ਇਹਨਾਂ ਨੇ ਇੰਗਲੈਂਡ ਵਿਚ ਪੰਜਾਬੀ ਮਾਸਕ ਪੱਤਰ ‘ਸਵੇਰਾ’ ਚਾਲੂ ਕੀਤਾ। ‘ਕ਼ਲਮ ਦੀ ਆਵਾਜ’ (1943) ਅਤੇ ‘ਗੱਲ ਬਾਤ’ (1950) ਇਹਨਾਂ ਦੀਆਂ ਵਾਰਤਕ ਰਚਨਾਵਾਂ ਹਨ। ‘ਸੂਲ ਸੁਰਾਹੀ’ (1955) ਅਤੇ ‘ਭਖਦੀਆਂ ਲਹਿਰਾ’, ਤ੍ਰੇਲ ਤੇ ਤਾਰੇ, 'ਤ੍ਰਿਵੇੈਣੀ' ਇਹਨਾਂ ਦੇ ਕਾਵਿ-ਸੰਗ੍ਰਹਿ ਹਨ। ਸੰਨ 1942 ਵਿਚ ਇਹਨਾਂ ਦੀ ਇਕ ਪੁਸਤਕ ‘ਗੁਰੂ ਨਾਨਕ ਦਰਸ਼ਨ’ ਪ੍ਰਕਾਸ਼ਿਤ ਹੋਈ। 2 ਦਸੰਬਰ, 1968 ਨੂੰ ਦਿਲ ਦਾ ਦੌਰਾ ਪੈਣ ਨਾਲ ਇਹਨਾਂ ਦੀ ਮੌਤ ਹੋ ਗਈ।