ਕੇਸਰ ਸਿੰਘ ਨੀਰ

ਕੇਸਰ ਸਿੰਘ ਨੀਰ ਪ੍ਰਸਿੱਧ ਪਰਵਾਸੀ ਪੰਜਾਬੀ ਕਵੀ, ਗਜ਼ਲਗੋ ਅਤੇ ਸਾਹਿਤਕਾਰ ਸਨ। ਉਹਨਾਂ ਦਾ ਜਨਮ 13 ਮਈ, 1935 ਈ. ਨੂੰ ਲੁਧਿਆਣਾ ਜਿਲ੍ਹਾ ਦੇ ਪਿੰਡ ਛੱਜਾਵਾਲ ਵਿਚ ਹੋਇਆ ਸੀ।  ਕੇਸਰ ਸਿੰਘ ਨੀਰ ਨੂੰ ਸਕੂਲ ਸਮੇਂ ਤੋਂ ਹੀ ਕਵਿਤਾ ਲਿਖਣ ਦਾ ਸ਼ੌਕ ਸੀ ਅਤੇ ਅੱਠਵੀਂ ਜਮਾਤ ਵਿਚ ਉਹਨਾਂ ਨੇ ਧਾਰਮਿਕ ਕਵਿਤਾਵਾਂ ਲਿਖਣੀਆਂ ਸ਼ੁਰੂ ਕਰ ਦਿੱਤੀਆਂ ਸਨ। ਉਹਨਾਂ ਨੇ ਐੱਮ.ਏ. ਅਤੇ ਬੀ. ਐੱਡ. ਦੀਆਂ ਡਿਗਰੀਆਂ ਹਾਸਲ ਕੀਤੀਆਂ ਅਤੇ ਅਧਿਆਪਕ ਵਜੋਂ ਕੰਮ ਕੀਤਾ।  ਪੰਜਾਬ ਵਿਚ ਉਹ ਅਧਿਆਪਕਾਂ ਦੇ ਅੰਦੋਲਨਾਂ ਵਿਚ ਸਰਗਰਮ ਰਹੇ ਅਤੇ ਅਧਿਆਪਕਾਂ ਦੇ ਹੱਕਾਂ ਲਈ ਲੜਾਈ ਵੀ ਲੜੀ ਅਤੇ ਕੁਝ ਮਹੀਨੇ ਜੇਲ ਵੀ ਕੱਟੀ।  ਇਸ ਤੋਂ ਬਾਅਦ ਉਹ ਕੈਨੇਡਾ ਚਲੇ ਗਏ ਅਤੇ ਕੈਲਗਰੀ ਵਿਚ ਵੱਸ ਗਏ।  ਉਥੇ ਉਹ ਅਰਪਨ ਲਿਖਾਰੀ ਸਭਾ, ਕੈਲਗਰੀ ਦੇ ਪ੍ਰਧਾਨ ਵਜੋਂ ਵੀ ਕੰਮ ਕੀਤਾ।

          ਕੇਸਰ ਸਿੰਘ ਨੀਰ ਪ੍ਰਿੰ. ਤਖਤ ਸਿੰਘ ਦੇ ਗ਼ਜ਼ਲ ਸਕੂਲ ਦੇ ਪ੍ਰਸਿੱਧ ਗ਼ਜ਼ਲਗੋ ਸਨ। ਉਹਨਾਂ ਨੇ ਦਰਜਨ ਤੋਂ ਵੱਧ ਪੁਸਤਕਾਂ ਪੰਜਾਬੀ ਸਾਹਿਤ ਦੀ ਝੋਲੀ ਪਾਈਆਂ ਹਨ ਜਿਨ੍ਹਾਂ ਵਿਚੋਂ ਕਾਵਿ ਸੰਗ੍ਰਹਿ ਕਸਕਾਂ, ਗ਼ਮ ਨਹੀਂ, ਆਰ ਦੀਆਂ ਪਾਰ ਦੀਆਂ, ਮਹਿਕਾਂ ਦੀ ਪੀੜ,  ਗ਼ਜ਼ਲ ਸੰਗ੍ਰਹਿਆਂ ਵਿਚ ਕਿਰਨਾ ਦੇ ਬੋਲ, ਅਣਵਗੇ ਅੱਥਰੂ ਪ੍ਰਮੁੱਖ ਹਨ। ਬਾਲ ਪੁਸਤਕਾਂ ਗਾਉਂਦੇ ਬਾਲ, ਝਿਲਮਿਝ ਝਿਲਮਿਝ ਤਾਰੇ, ਫੁੱਲ ਰੰਗ ਬਿਰੰਗੇ ਅਤੇ ਮਿੱਠੀਆਂ ਮੁਸਕਾਨਾਂ ਰਾਹੀਂ ਬਾਲ ਸਾਹਿਤ ਵਿਚ ਵੀ ਆਪਣਾ ਯੋਗਦਾਨ ਦਿੱਤਾ।

          ਕੇਸਰ ਸਿੰਘ ਨੀਰ ਨੂੰ ਬਹੁਤ ਸਾਰੀਆਂ ਸਾਹਿਤਕ ਸਭਾਵਾਂ ਅਤੇ ਸੰਸਥਾਵਾਂ ਵੱਲੋਂ ਸਨਮਾਨਿਤ ਕੀਤਾ ਗਿਆ। ਜਿਸ ਵਿਚ ਭਾਸ਼ਾ ਵਿਭਾਗ ਪੰਜਾਬ ਵੱਲੋਂ ਸ਼੍ਰੋਮਣੀ ਪੰਜਾਬੀ ਸਾਹਿਤਕਾਰ ਅਤੇ ਅਰਪਨ ਲਿਖਾਰੀ ਸਭਾ ਕੈਲਗਰੀ ਵੱਲੋਂ ਲਾਈਫ ਟਾਈਮ ਅਚੀਵਮੈਂਟ ਐਵਾਰਡ ਦੇ ਕੇ ਸਨਮਾਨਿਤ ਕੀਤਾ ਗਿਆ।  ਕੇਸਰ ਸਿੰਘ ਨੀਰ ਦਾ ਦੇਹਾਂਤ 5 ਅਪ੍ਰੈਲ 2025 ਈ. ਨੂੰ ਕੈਨੇਡਾ ਵਿਚ ਹੋ ਗਿਆ ।