ਫ਼ੈਸਲਾ

ਤੁਸੀਂ ਜੋ ਜ਼ਿੰਦਗੀ ਵਿਚ

ਰੀਂਗਦੇ ਹੋਏ ਕੀੜਿਆਂ ਵਰਗੀ

ਹਿਯਾਤੀ ਨਾਲ ਖੁਸ਼ ਹੋ

ਤਾਂ ਮੁਬਾਰਕ !

ਅਸਾਂ ਨੂੰ ਰੀਂਗਦੀ ਹੋਈ ਜ਼ਿੰਦਗੀ ਦੇ ਨਾਲ ਨਫ਼ਰਤ ਹੈ

ਤੁਸੀਂ ਪਰਕਾਰ ਵਾਂਗੂੰ

ਦਾਇਰਿਆਂ ਵਿਚ ਜੇ ਘਿਰੇ ਰਹਿਣਾ

ਤਾਂ ਸਾਡੀ ਅਲਵਿਦਾ !

ਅਸੀਂ ਪਰ ਮੀਲ ਪੱਥਰ ਵਾਂਗ ਗੱਡੇ ਰਹਿਣ ਵਿਚ

ਵਿਸ਼ਵਾਸ ਨਹੀਂ ਰਖਦੇ

ਅਸੀਂ ਇਕ ਸਫ਼ਰ ਬਣ ਕੇ ਜੀਣ ਵਿਚ

ਵਿਸ਼ਵਾਸ ਰਖਦੇ ਹਾਂ

`ਤੇ ਅੱਜ ਗੁਲਮੋਹਰ ਦੇ ਫੁੱਲਾਂ ਦੇ ਰੰਗ ਵਰਗਾ

ਅਜ਼ਮ ਲੈ ਕੇ ਤੁਰੇ ਹਾਂ

ਗਲੀਂ ਸੋਨੇ ਦੀਆਂ ਬਣੀਆਂ

ਸਲੀਬਾਂ ਪਾਉਣ ਦੀ ਥਾਂ

ਸਲੀਬਾਂ ਦੇ ਗਲਾਂ ਵਿਚ ਲਟਕ ਜਾਣ ਦਾ

ਅਸੀਂ ਜੇ ਫ਼ੈਸਲਾ ਕੀਤਾ

ਤਾਂ ਇਸ ਦੇ ਨਾਲ ਈਸਾ ਦਾ ਨਿਰਾਦਰ ਕਿਸ ਤਰ੍ਹਾਂ ਹੋਇਆ ?

ਤੁਸੀਂ ਇਹ ਫ਼ੈਸਲਾ ਸੁਣ ਕੇ

ਜੇ ਸਾਡੇ ਸਿਰਾਂ ਦਾ ਅੱਜ ਮੁੱਲ ਪਾਇਆ ਹੈ

ਅਸੀਂ ਮਸ਼ਕੂਰ ਹਾਂ ਸਾਰੇ

ਅਸਾਡੇ ਗੋਲੀਆਂ ਵਿੰਨ੍ਹੇ ਜਿਸਮ ਤੇ ਸਿਰ

ਤੁਸੀਂ ਹਰ ਸ਼ਹਿਰ ਦੀ ਦੀਵਾਰ 'ਤੇ ਟੰਗ ਕੇ

ਪਏ ਲੱਖ ਇਬਰਤਾਂ ਦੇਵੋ

ਅਸਾਂ ਨੇ ਕਦੇ ਵੀ ਪਰ ਰਹਿਮ ਦੇ ਪਾਤਰ ਨਹੀਂ ਬਣਨਾ

ਅਸੀਂ ਗੁਲਮੋਹਰ ਦੇ ਫੁੱਲਾਂ ਦੇ ਰੰਗ ਵਰਗਾ

ਅਜ਼ਮ ਲੈ ਕੇ ਤੁਰੇ ਹਾਂ

ਅਸੀਂ ਇਕ ਸਫ਼ਰ ਬਣ ਕੇ ਜੀਣ ਵਿਚ ਵਿਸ਼ਵਾਸ ਰਖਦੇ ਹਾਂ ।