Nadeem Parmar

ਨਦੀਮ ਪਰਮਾਰ, ਜਿਹਨਾਂ ਦਾ ਅਸਲ ਨਾਮ ਕੁਲਵੰਤ ਸਿੰਘ ਪਰਮਾਰ ਸੀ, ਇੱਕ ਪ੍ਰਸਿੱਧ ਪੰਜਾਬੀ ਲੇਖਕ, ਕਵੀ ਅਤੇ ਸਮਾਜਿਕ ਟਿੱਪਣੀਕਾਰ ਸਨ। ਨਦੀਮ ਪਰਮਾਰ ਦਾ ਜਨਮ 9 ਜੂਨ 1936 ਈ. ਨੂੰ ਜ਼ਿਲਾ ਲਾਇਲਪੁਰ (ਪਾਕਿਸਤਾਨ) ਵਿਚ ਹੋਇਆ।  ਉਹਨਾਂ ਦੇ ਪਿਤਾ ਦਾ ਨਾਮ ਲਖਮੀਰ ਸਿੰਘ ਅਤੇ ਮਾਤਾ ਦਾ ਨਾਂ ਦਵਿੰਦਰ ਕੌਰ ਸੀ।  ਨਦੀਮ ਪਰਮਾਰ ਨੇ ਅਪਣੇ ਬਚਪਨ ਦਾ ਕੁਝ ਹਿੱਸਾ ਹੋਤੀ ਮਰਦਾਨ, ਕਪੂਰਥਲਾ ਅਤੇ ਕੁਝ ਹਿੱਸਾ ਸ਼ੀਲਾਂਗ ਬਤਾਇਆ।  ਉਹਨਾਂ ਨੇ ਪੰਜਾਬ ਕਾਲਜ ਵਿਚੋਂ ਬੀ.ਐਸ.ਸੀ., ਬੀ.ਟੀ, ਬੀ.ਏ. (ਉਰਦੂ) ਕਮਿਉਨੀਕੇਸ਼ਨ ਅਤੇ ਲੈਨਕੈਸਟਰ ਤੋਂ ਇੰਜੀਨੀਅਰ ਦੀ ਡਿਗਰੀ ਹਾਸਲ ਕੀਤੀ। ਆਪਣੀ ਪੜ੍ਹਾਈ ਪੂਰੀ ਕਰਨ ਤੋਂ ਬਾਅਦ ਉਹਨਾਂ ਨੇ 1959 ਈ. ਵਿਚ ਅਨਟ੍ਰੇਂਡ ਟੀਚਰ ਬਤੌਰ ਪੱਟੀ ਹਾਈ ਸਕੂਲ ਹੁਸ਼ਿਆਰਪੁਰ ਵਿਚ ਕੰਮ ਕੀਤਾ।  ਉਹਨਾਂ ਨੇ ਕੁਝ ਸਾਲ ਇੰਗਲੈਂਡ ਵਿਚ ਕੰਮ ਕੀਤਾ ਅਤੇ ਅੰਤ ਨੂੰ ਕੈਨੇਡਾ ਵਿਚ ਆ ਕੇ ਵਸ ਗਏ ਸਨ।

          ਨਦੀਮ ਪਰਮਾਰ ਨੇ ਸਭ ਤੋਂ ਪਹਿਲਾ ਉਰਦੂ ਵਿਚ ਗ਼ਜ਼ਲ ਲਿਖਣੀ ਸ਼ੁਰੂ ਕੀਤੀ। ਉਹਨਾਂ ਦੇ ਗ਼ਜ਼ਲ ਉਸਤਾਦ ਨੇ ਹੀ ਉਹਨਾਂ ਦਾ ਨਾਂ ਕੁਲਵੰਤ ਤੋਂ ਨਦੀਮ ਪਰਮਾਰ ਰੱਖ ਦਿੱਤਾ ਸੀ।  1990 ਈ. ਤੋਂ ਬਾਅਦ ਉਹਨਾਂ ਨੇ ਪੰਜਾਬੀ ਵਿਚ ਗ਼ਜ਼ਲ ਲਿਖ਼ਣੀ ਸ਼ੁਰੂ ਕੀਤੀ। ਪਰਮਾਰ ਨੇ ਤਕਰੀਬਨ ਅੱਠ ਪੰਜਾਬੀ ਦੀਆਂ ਪੁਸਤਕਾਂ, ਦੋ ਉਰਦੂ ਪੁਸਤਕਾਂ ਅਤੇ ਇੱਕ ਅੰਗਰੇਜ਼ੀ ਨਾਵਲ ਲਿਖਿਆ। ਉਹਨਾਂ ਦੇ ਕਾਵਿ ਸੰਗ੍ਰਹਿ ਰੂਪਹਿਲੀ ਛਾਂ, ਨਿਮਰਤਾ, ਬਿੰਦੂ ਤੋਂ ਉਰੇ ਅਤੇ ਨਦੀਮ ਵਿਚ ਸਾਰੀਆਂ ਗ਼ਜ਼ਲਾਂ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਉਹਨਾਂ ਨੇ ਗ਼ਜ਼ਲ ਨਾਂ ਪਰਚਾ ਵੀ ਸ਼ੁਰੂ ਕੀਤਾ ਸੀ ਜਿਸ ਵਿਚ ਦੁਨੀਆਂ ਭਰ ਦੇ ਗ਼ਜ਼ਲਕਾਰਾਂ ਨੂੰ ਛਾਪਿਆ ਗਿਆ ਸੀ।

          2015 ਈ. ਵਿਚ ਉਨ੍ਹਾਂ ਨੂੰ ਰਾਈਟਰਜ਼ ਇੰਟਰਨੈਸ਼ਨਲ ਨੈੱਟਵਰਕ ਵੱਲੋਂ ਲਾਈਫਟਾਈਮ ਅਚੀਵਮੈਂਟ ਅਵਾਰਡ ਮਿਲਿਆ। ਨਦੀਮ ਪਰਮਾਰ ਦੀ ਮੌਤ 18 ਅਪ੍ਰੈਲ 2025 ਈ. ਨੂੰ ਹੋ ਗਈ।