ਸ਼ਰੀਫ ਕੁੰਜਾਹੀ ਦਾ ਜਨਮ ਪਿੰਡ ਕੁੰਜਾਹ, ਤਹਿਸੀਲ ਫਾਲੀਆਂ, ਜਿਲਾ ਗੁਜ਼ਰਾਤ ਵਿਚ 13 ਅਕਤੂਬਰ 1915 ਨੂੰ ਹੋਇਆ । ਸ਼ਰੀਫ ਕੁੰਜਾਹੀ ਉਰਦੂ ਅਤੇ ਫ਼ਾਰਸੀ ਵਿਚ ਉਚ-ਵਿੱਦਿਆ ਪ੍ਰਾਪਤ ਹਨ। ਸਾਰੀ ਜ਼ਿੰਦਗੀ ਕਾਲਜ ਵਿਚ ਅਧਿਆਪਨ ਕਰਦੇ ਰਹੇ। ਉਹ ਪੰਜਾਬੀ ਦੇ ਪ੍ਰਮੁੱਖ ਕਵੀ ਹੋਣ ਤੋਂ ਇਲਾਵਾ ਆਲੋਚਕ, ਖੋਜੀ ਅਤੇ ਅਨੁਵਾਦਕ ਵੀ ਹਨ । ਉਨ੍ਹਾਂ ਦੀਆਂ ਕਾਵਿ ਪੁਸਤਕਾਂ ਝਾਤੀਆਂ, ਜਗਰਾਤੇ ਆਦਿ ਹਨ। ਉਨ੍ਹਾਂ ਦੀ ਕਵਿਤਾ ਵਿਚ ਇਕ ਪਾਸੇ ਪੇਂਡੂ ਪਰੰਪਰਾ ਹੈ ਅਤੇ ਦੂਸਰੇ ਪਾਸੇ ਆਧੁਨਿਕ ਸ਼ਹਿਰੀ ਗਿਆਨ ਵੀ ਹੈ। ਉਸ ਕੋਲ ਆਧੁਨਿਕ ਵਿਚਾਰਧਾਰਾ ਵੀ ਹੈ ਅਤੇ ਵਿਸ਼ਾਲ ਲੋਕਾਈ ਦਾ ਦਰਦ ਵੀ । ਕਿਸਾਨੀ ਸਮੱਸਿਆਵਾਂ ਦੀ ਪੇਸ਼ਕਾਰੀ ਵੀ ਹੈ ਅਤੇ ਸਥਾਪਤੀ ਦਾ ਵਿਰੋਧ ਵੀ ਹੈ। ਇਕ ਤਰ੍ਹਾਂ ਨਾਲ ਉਨ੍ਹਾਂ ਦੀ ਕਵਿਤਾ ਸਮੁੱਚੀ ਪਾਕਿਸਤਾਨੀ ਪੰਜਾਬੀ ਕਵਿਤਾ ਦੀ ਇਕ ਪ੍ਰਤੀਨਿਧਤ ਮਿਸਾਲ ਹੈ। ਸਭ ਤੋਂ ਖੂਬਸੂਰਤ ਗੱਲ ਤਾਂ ਇਹ ਹੈ ਕਿ ਉਸ ਦੀ ਕਵਿਤਾ ਵਿਚ ਧਾਰਮਿਕ ਕੱਟੜਤਾ ਦੀ ਥਾਂ ਤੇ ਮਜ੍ਹਬੀ ਰਵਾਦਾਰੀ ਹੈ। ਸ਼ਰੀਫ ਕੁੰਜਾਹੀ ਨੇ ਵੀਰਾ ਤੂੰ ਕੁੰਜਾਹ ਦਾ ਏਂ ਵਰਗੀ ਸ਼ਾਹਕਾਰ ਰਚਨਾ ਰਚੀ।
